Biktima nisukol, tulisan patay

CEBU, Philippines — Patay ang usa sa duha ka gidudahang tulisan nga nisuway sa pagpanulis sa tindahan sa market inspector sa merkado publiko sa Lungsod sa Consolacion human nisukol ang tag-iya niini.    

Unang gitulis sa duha alas 7:30  sa gabii sa Barangay Tayud sa Lungsod sa Consolacion.                                           

Si  Police Corporal Crisencio  Saladaga imbestigador sa Consolacion Police Station miila sa namatay nga mao si Ruel  Narvasa, taga Barangay Lanipga sa Lungsod sa Consolacion.

Samtang ang kauban niini nga maoy nagdala sa motorsiklo wala pa mailhi apan nagsuot kini og yellow t-shirts mipabulhot palayo ug gibiyaan si Narvasa pagkatagak niini sa motorsiklo dihang naigo sa bala.

Si Saladaga miingon nga unang  gitulis sa duha si Florenz  Tades  Penida, 41,tag-iya og tindahan sa Barangay Tayud sa  maong lungsod. Matud pa nadala sa duha ang iyang halin nga P2 mil ug giapil pagdala ang mahalon niyang sigarilyo.

Si Police Staff Master Sergeant Jayson Gayo sa Liloan Police Station miingon nga gihapit sab pagtulis sa duha ang tindahan ni Teodoro Hatamosa, kinsa mao ang market inspector sa merkado publiko sa lungsod.

Naatol nga diha si Hatamosa sa iyang tindahan sa pagtulis sa duha, malas lang sa duha tungod kay dunay lisensyadong armas nga kalibre 45 pistola ang tag-iya hinungdan nga nahitabo ang pinusilay.                

Sa  dayon na nga pagsibat  sa duha sakay sa motorsiklo natagak si Narvasa tungod kay naigo na diay kini. Wala na siya panumbalinga sa kauban ug mipabulhot kini palayo.

 Si Gayo miingon nga gidala ngadto sa Eversely Child Sanitarium General Hospital  sa Barangay Jagobiao sa Dakbayan sa Mandaue s Narvasa apan gideklarar kini nga dead on arrival.

Si Gayo miingon nga nakuha gikan sa suspek ang kalibre  .357 nga armas. —IBM (BANATNEWS)