Guadalupe dunay daghang kaso

CEBU, Philippines — Nagpabiling ang Barangay Guadalupe sa Dakbayan sa Sugbo maoy nag-una sa 80 ka barangay nga adunay daghang kaso sa coronavirus  base sa talaan sa Emergency Operations Center gikan sa Enero 25, 2021 hangtud Pebrero 7, 2021 pinaagi sa ilang 167 ka mga kaso.

Nagsunod sa Guadalupe ug nilangkob sa top 10 mao ang Labangon-81; Apas-77; Talamban-77; Lahug-63; Tisa-63; Bo. Luz-59; Capitol Site-54; Kasambagan-54 ug Punta Princesa-54.

Subling gibasol ni Konsehal Joel Garganera, ang Deputy Chief Implementer sa Emergency Operation Center, ang pagtaas sa mga kaso sa tawo. Apan matud niya, naa ra gihapon sa tawo ang yawe aron kini mokunhod pagbalik.

Ang tawo maoy nagpasagad sa pagsunod sa mga health protocols mao nga misaka ang kaso, ug pinaagi sab sa pagsunod sa tawo niining mga health protocols mapakubsan balik kining mga kasoha. Apan nasagmuyo siya kay bisan paman sa padayon karong pagsaka sa mga kaso daw wala gihapon seryusoha sa mga tawo base lang sa gidaghanon sa mga nangadakpang quarantine violators.

Bisan sa tag lapas 100 na ka kaso kada adlaw ang natala, dili morekomendar ang Cebu City Police Office (CCPO)  nga padak-an pa ang multa sa mga quarantine violators matud pang Police Lieutenant Colonel Wilbert Parilla, CCPO deputy director for operations.

Alang kaniya ang P500 administrative fine sa unang pagkasakop paigo na tungod magkadako man kini kung madakpan pagusab.

Base sa ilang obserbasyon mikubos ang gidaghanon sa mga violators paglabay sa mga adlaw pinaagi sa Oplan Bulabog.

Base sa natala niadtong adlaw nga Lunes, ang siyudad dunay nadugang nga 151 ka bag-ong kaso  sumala pa sa Department of Health Central Visayas.

Sa kinatibuk-an nga 13,625  ka mga kaso, 2,218 niini ang active cases karon. Duna nay 706 ang nakalas.

Samtang ang Mandaue City aduna karoy 470 active cases gikan sa ilang 3,294 ang total cases human nadugangan og 34 ka bag-ong kaso. Samtang ang Lapu-Lapu City dunay 382 ka active cases gikan sa kinatibuk-ang 3,182 niini ka mga kaso  human dunay siyam nga  nadugang.

Sa datos sa DOH-7 ang Central Visayas dunay 31,019 total cases diin  4,465 niini ang active cases; 25,061 ang nangaayo na ug 1,493 ang nakalas. —Decemay P. Padilla, The Freeman/IBM