Road clearing sa siyudad magpadayon

CEBU, Philippines — Gipahibawo ni Mayor Edgar Labella nga dugang road clearing ang pagahimoon sa siyudad agig pagsanong sa mando sa Department of Interior and Local Government (DILG)ngadto sa mga local government units sa paguba sa mga nakabalda sa kadalanan.

Nasayran gilugwayan sa DILG hangtud sa Pebrero 15 ning tuiga ang hingpit nga pagpatuman sa ilang kamanduan ug isunod dayon niini ang evaluation. Magpadala usab og sulat si Labella ngadto sa utility companies aron awhagon kini nga mosuporta sa ilang road clearing campaign pinaagi sa pagpadala og mga tawo aron maoy motangtang sa wala magamit nga utility boxes ug pag-ayo sa spaghetti wires. Una niini gipahibalo na sa  Prevention, Restoration, Order, Beautification and Enhancement (PROBE) team nga nahuman na nila paghawan mga areas diha sa Colon, pipila ka bahin sa north reclamation area, Osmeña Boulevard ,ug sa gawas nga bahin sa South Bus Terminal.

Suma pa sa  hepe sa PROBE nga si Raquel Arce nga gawas sa 500 ngadto sa 600 ka vendors, ilaha usab nga nabadlong ang mga tawo nga gihimong puy-anan ug istambayanan ang mga sidewalk.

Gitataw ni Arce nga dili gihapon sila mohunong sa ilang operasyon ug kanunay nga magmonitor sa mga karsada sa syudad.

Samtang ang Cebu City Transportation Office (CCTO) nagpadayon usab sa subsob nila nga operasyon sa paghawan sa kadalanan ilabi na ang pagsumpo sa mga nagpataka og parking.

Gipahimug-atan sa CCTO ang importansya sa pagsumpo sa mga illegal parking aron mahatagan og hamugaway nga dalan ang mga tawo ingon man usab ang emergency vehicles. —MEL (BANATNEWS)