SK pagahinan og espasyo diha sa mga barangay hall

CEBU, Philippines — Nabantayan nga adunay opisyales sa Sangguniang Kabataan ang wala gihapoy opisina ug walay mga youth center ang ubang mga barangay.

Ug gumikan niini, niduso og ordinansahon si Sangguniang Kabataan Federation -Cebu City President Jessica Resch nga nag-awhag  sa tanang mga barangay sa siyudad nga mogahin og  office space alang sa Sangguniang Kabataan officials ug magsilbi usab kini nga barangay youth center.

Ug ipahimutang kini sa bisan asa nga parte sa barangay hall. Ang maong ordinansahon giduso na ngadto sa committee on laws, ordinances, and styling alang sa dugang review.

Tumong sa youth center nga mahatagan og igong lugar ang kabatan-onan sa mga barangay sa higayon nga mopadangat sila sa ilang mga concern.

Sa susamang higayon adunay haom nga lugar ang SK officials alang sa pagahimuon nila nga mga tigom.

Kinahahanglan nga accessible usab kini sa ilang mga konsituwente sa bisan unsang orasa.

“This ordinance aims to provide the youth a venue to address their needs and an office to go to when they seek for assistance. To this end, the State shall establish adequate, effective, responsive and enabling mechanism and support system to address the needs of the youth which is the establishment of a Sangguniang Kabataan office which shall also be used as barangay youth center within the barangay hall of each barangay in Cebu City”, tipik sa nahisgutang ordinansahon.

Giingong dako usab nga gamit ang maong espasyo alang nagkadaiyang kalihokan sa kabatan-onan.

Si Resch nitumbok usab sa dakong partisipasyon sa kabatan-onan  alang sa kalamboan sa komunidad. —BDB (BANATNEWS)