Polis patay sa aksidente
CEBU, Philippines — Patay diha-diha dayon ang usa ka polis human ang iyang gimanehong sakyanan nibangga sa gikasugat nga truck diha sa Barangay Linao, Dakbayan sa Talisay niadtong Domingo sa gabii.
Ang biktima nailhan nga si Police Staff Sergeant Niño Nito Dahili, 40, kinsa dadestino siya sa Dakbayan sa Carcar. Samtang ang nagmaneho sa truck mao si Lucio Roland.
Si Patrolman Ricky Aibores sa Linao Police Community Precinct nagkanayon nga gikan sa amihanan si Dahili nagmaneho sa iyang awto paingon sa habagatan.
Apan pag-abot niya sa nahisgutang lugar gikatahong kalit kini nga nitipas sa pikas nga lane ug gipangharos ang mga cone barriers.
Matud pa ni Aibores nga nabangga si Dahili sa truck hinungdan sa pagkapiyapi sa hood sa sakyanan niini ug maayo niyang pagkapiit.
Gitabang si Dahili sa mga tawo apan nakabsan gyud kini sa iyang kinabuhi.
Si Roland sa iyang bahin mitug-an sa kapolisan nga wala na siya nakalihay pa gumikan sa kapaspas sa panghitabo.
Nangayo nalang siya og pasaylo sa tagtungod sa namatay gumikan kay disgrasya man gyud ang nahitabo.
Nagduda ang mga imbestigador nga posibleng nakatagpilaw samtang nagmaneho si Dahili mao nga nitipas kini og dalan.— IBM (BANATNEWS)
- Latest