Chan uyon nga usbon ang pangan sa MCIA

CEBU, Philippines — Gipadayag ni Lapu-lapu City Mayor Junard Ahong Chan ang iyang pag-uyon sa pag-usab sa pangan sa Mactan Cebu International Airport.

Suma pa ni Chan nga alang sa win-win solution, mas maayo nga panganlan na lang kini og Lapu-Lapu Mactan Cebu International Airport.

Una niini si Lapu-Lapu City Lone District Representative Paz Radaza nagtinguha sa pag-usab sa pangan niini ngadto sa Lapu-Lapu International Airport nga maoy unod sa iyang house bill No. 2222.

Bisan og managlahi ang opinion ni Chan ug Radaza kabahin niini apan sila pulos miingon nga ang pagbutang sa pangan nga Lapu-lapu maoy agig pagpasidungog sa unang bayani sa nasud.

Kahinumduman si Radaza misang-at sa maong balaudnon sa House of Representatives niadtong Hulyo 17, 2019. Samtang si Chan sa iyang bahin miingon nga makigtagbo siya kang Cebu Third District Representative Pablo John Garcia, kinsa una nang misupak sa pag-usab sa pangan sa MCIA atol sa inisyal nga hearing. “Akong hangyu-on mismo si Congressman Pablo John nga i-apil ang name ni LapuLapu isip paghatag og honor sa first hero. Naa lang gihapon dapat ang Mactan kay before Lapu-Lapu City, it`s called Mactan Island man gyud. Unya naa gihapon ang Cebu kay the airport is located in Cebu nga makita sa map,” suma pa ni Chan.

Ang Mactan Cebu International Airport Authority sa ila usab nga gisumitir nga position paper ngadto sa House Committee on Transportation, mipadayag usab og pagsupak sa pag-usab sa pangan sa airport.

Si Atty. Glenn Napuli, MCIAA acting general manager miingon nga ilang isumitir ang ilang position paper ngadto ni House Speaker Lord Allan Velasco sa ilang meeting karong adlawa uban sa mga opisyales sa Dakbayan sa Lapu-lapu. The Freeman/MEL