Paburot sa presyo sa karne, isda ug palaliton sa Carbon Market ipasusi

CEBU, Philippines — Gipaimbestigaran karon sa Market Operations Division (MOD)  ang giingong  mga supplier sa karneng baboy ug mga palaliton diha sa Carbon Market nga nagpaburot sa ilang presyo.

Nasayran nga nagmahal na ang baligyang karne sa merkado, bisan ang mga imported nga karne nisaka og maayo ang presyo. Ang pagsaka sa presyo sa karneng baboy nakaapektar og maayo sa mga konsumidor.

Kini tungod kay daan ng mahal ang presyo sa mga utanon hasta ang mga isda diha sa merkado.

Labaw nga nakapahibulong sa mga pumapalit mao kining mahal nga presyo sa isda diha sa Carbon Public Market nga unta abunda man ang supply niini base kini sa pagdaghan sa mga pwesto sa mga namaligya og isda diha sa maong merkado.

Bahin sa karneng baboy, gipasangil sa mga meat vendors nga nihit ang supply sa baboy.

Matud pa sa hepe sa MOD nga si Irvin Cabales nga duna silay “price monitoring” sa mga karne apan sa gihapon wala man kini makapaubos sa presyo.

Plano karon ni Cabales nga makigalayon sa Department of Trade and Industry (DTI) aron pagtino kun matawag ba kining “overpricing” sanglit ang maong ahensiya man ang nagkontrol sa pagsaka sa presyo sa palaliton.

Nasayran nga gikan sa P180 o P220, ang presyo sa karneng  baboy niabot na karon og P260 hangtud sa P280 matag kilo.

Samtang ang presyo sa manok nga P160 kaniadto, niabot na og P180 ngadto sa P200 matag kilo.

Matud pa niya nga normal kang gyud nga magtaas ang presyo sa karne ilabi na kun minos kaayo ang supply apan dili makaturanganon kun magpahimulos ang mga negosyante nga dili na mopaus-os sa presyo bisan nabalik na sa normal ang ilang supply.

Matud niya kun mahibaw-an nila pinaagi sa DTI kining mga tindahan nga nagpaburot sa presyo, bakwian sila sa ilang business permits o pasirad-an ilang puwesto. —IBM (BANATNEWS)