Garcia wala ka uyon sa padayong pag-ihap sa kaso sa COVID-19
CEBU, Philippines — Wala makauyon si Cebu Governor Gwendolyn Garcia sa padayon nga pag-ihap sa COVID-19 cases sa Probinsiya sa Sugbo lakip na ang gidaghanon sa mga lungsod ug siyudad nga COVID-19 free.
Si Garcia nagkanayon nga wala na magpaabot ang probinsiya nga makab-ot ang zero cases sa COVID-19 tungod kay anaa naman ang maong sakit, ang importante nga maayo ang pagdumala sa kaso sa matag lungsod.
Nihimo og reaksiyon si Garcia human sa report nga 10 na lang ka LGUs ang wala nay kaso sa COVID-19.
“Mao ba gyud diay na ang importante? Mag-inihap nalang ta? Kanos-a man ko miingon nga we will ever achieve zero COVID? Naka-achieve ba ta og zero tuberculosis? Nakakab-ot ba ta og zero dengue? Or for that matter, wala na ba’y hilanat? Aw di naman na hilanat ron, COVID naman na. Wa na ba’y sip-on? Aw wa na may sip-on ron, COVID naman na”, matud ni Garcia.
Imbes nga motutok ra sige sa COVID-19, gitutokan karon sa probinsiya ang pagbuhi og balik sa ekonomiya nga naapektohan sa pandemiya samtang padayon nga nisunod sa health protocols.
“Let’s strengthen and boost our immune system. Let’s follow health protocols. Let us be hygienic. But beyond that atong buhaton mo focus ta nga maka-recover intawon ning ekonomiya nato”, dugang ni Garcia.
Sa laing bahin, ang Cebu City nakatala og 88 ka bag-ong kaso sa COVID-19 base sa datos nga gipagawas sa Department of Health (DOH)-7 niadtong Martes.
Ang Cebu City adunay 12,019 total cases diin 986 niini ang active cases.
Niabot na usab ngadto sa 10,332 ang recoveries sa Cebu City lakip niini ang 57 nga ulahing nadugang ug 701 ang gidaghanon sa namatay.
Ang Mandaue City adunay 2,973 ka kaso diin 248 niini active cases lakip niini ang 23 nga ulahing nadugang.
Ang siyudad aduna kini 2,551 ka recoveries lakip niini ang walo ka nadugang ug 174 ang gidaghanon sa namatay lakip niini ang duha nga nadugang.
Ang Lapu-Lapu City adunay 1,818 ka kaso diin 119 niini ang active cases lakip niini ang siyam nga nadugang, 2,587 ang recoveries lakip ang siyam usab nga nadugang ug 112 ang gidaghanon sa namatay.
Ang Dakbayan sa Talisay adunay 1,148 ka kaso lakip niini ang upat nga bag-ong nadugang diin 69 niini ang active cases, 976 ang recoveries lakip niini ang pito nga ulahing natala ug pabilin gihapon nga 103 ang gidaghanon sa namatay.
Sa datos sa DOH-7, ang Central Visayas adunay 27,691 total cases, 2,667 ang active cases; 23,559 ang recoveries ug 1,465 ang namatay. —Decemay P. Padill, Gabriel C. Bonjoc/BDB (BANATNEWS)
- Latest
