Dul-an 100 quarantine violators sa kamerkadohan ang nadakpan

CEBU, Philippines — Dul-an 100 ka tawo ang gisikop duga sa mga kamerkadohang gidumala sa Dakbayan sa Sugbo tungod kay wala sila magsuot og facemask human subling gipahugtan ang pagpatuman sa health protocols sa siyudad. Si Market Operation Division Chief Irvin Cabales nga gikahinabi sa Banat News miingon nga niadto pang Domingo nila gipahibalo ang paghigpit.

Apan bisan sa ilang pahimangno ug pahibalo aduna gihapoy mga tawo nga malapason ug wala motuman hinungdan nga sila gidakop.

Ang mga nadakpan gikan sa Carbon Complex- 46 ka tawo; T. Padilla-10; Ramos-9 ug Taboan-7.

Dugang pa ni Cabales, ang mga nadakpan gi turn-over ngadto sa Covid Action Team sa Tejero Gym  diin sila gimandoan sa pagmulta og P500  ug kadtong walay ikabayad silotan pinaagi sa community service sud sa walo ka oras.

Sa duha ka adlaw nga operasyon sagol vendors, mamalitay ug naglaruy-laroy lang sa kamerkadohan nga wala magsuot og facemask ang ilang nadakpan. —Rowena Capistrano/IBM (BANATNEWS)