Dunay establisamentong wala mokooperar sa contact tracing effort

CEBU, Philippines — Gihangyo sa Emergency Operations Center (EOC) ang mga establisamento nga mo kooperar sa contract tracing team.

Giingong adunay uban ang nagmagahi sa paghatag og kooperasyon.

Matud pa sa hepe sa EOC Konsehal Joel Garganera nga importante kaayo ang kooperasyon sa mga establisamento aron makakuha sila og paspas nga data ingon man  ang “early detection” ilabi na kadtong  nag-manifesto og sintomas sa COVID-19.

Gipahimangnoan ni Garganera ang mga administrador sa nagkadaiyang establisamento nga molihok sa ilang mga responsibilidad aron dili ipasira ang ilang negosyo.

Matud usab ni Garganera nga sa  sitwasyon karon nga nagkasaka na og maayo ang kaso sa COVID-19 sa siyudad importante kaayo ang pagtinabangay.

“Mo-cooperate man gani ang atong mga hospital, sila na hinoun ang dili?”, ni Garganera pa.

Ang EOC nagpahigayon kini og lapad nga monitoring ug panawagan nila sa katawhan nga dili mokompiyansa.

Gani giawhag sa EOC ang publiko nga i-report pinaagi sa ilang facebook page ang binuhatan sa quarantine violators.

Si Garganera nagkanayon nga mas maayo nga kuhaan kini og hulagway  ug ipadala ngadto kanila.

Si Garganera nagkanayon usab nga ilaha kining i-verify daan sa dili pa nila i-post diha sa ilang page.

Dugang ni Garganera nga aduna gyu’y gahi nga mga tawo ug wala siya’y plano nga motubay sa mga indibidwal nga dili motuo nga tinuod ang COVID-19.

Niadtong Domingo niabot ngadto sa 113  ka quarantine violators sa siyudad ang natanggong sa holding area diha sa Barangay Tejero ug Labangon. —BDB (BANATNEWS)