Walo sa 12 nakalas sa Cebu City mga seniors

CEBU, Philippines — Walo sa mga nakalas sa Covid-19 karong buwan sa Enero ning tuiga mga senior citizens matud pa sa Deputy Chief Implementer sa Emergency Operations Center Konsehal Joel Garganera sa mga tigbalita.

Matud pa niya 12 nga nakalas sa buwan sa Enero ug walo niini mga senior citizens. Giingong walay gawas-gawas sa ilang pinuy-anan ang walo base sa impormasyon.

Apan bisan og dili sila mogawas aduna man silay mga sakop sa banay nga maoy laagan ug maoy nakakuha sa maong sakit ug nadala sa ilang paguli.

Nanawagan sila pagusab nga likayan ang paggawas sa balay kun di importante ug kun gikinahanglan man, magamping ug mosunod sa health protocols.

10 LGU nalang

Moabot nalang og napulo ka local government units sa lalawigan sa Sugbo ang walay aktibong kaso sa coronavirus disease base sa uwahing datus sa Provincial Health Office niadtong Enero 23, 2020.

Ang maong mga LGUs mao ang Alcoy, Alegria, Aloguinsan, Boljoon, Oslob, San Francisco, Pilar,  Tudela, Tabuelan ug Tuburan. Giingong misaka gyud ang mga kaso karong buwana ug base sa Enero 23 nga datus sa PHO, anaa sa 498 ang aktibong kaso karon sa lalawigan.

Hinuon si Dr. Christina Giango, ang pangulo sa PHO miingon nga anaa ra sa 6.6% ang active cases gikan sa 7,586 nga kinatibuk-ang natalang kaso sa lalawigan.

“Dili man na sya ingon daghan sa kada lungsod. Pero di gihapon mokompyansa,” pasidaan ni Giango. Samtang anaa usab sa 6,662 ang recoveries o 87.8 % ang recovery rate. Ang namatay 426 apan 121 lang ang nakalas sa Covid-19,  samtang 299 ang incidental findings ug unom ang wala pay diagnosis.

Kaso sa Cebu City

Sa pikas bahin,  padayon ang pagsaka sa mga bag-ong kaso sa Cebu City human 81 na sab ang napuno niadtong adlaw nga Domingo sumala pa sa Department of Health Central Visayas.

Ang Cebu City dunay 11,861 total cases ug 903 niini ang active cases samtang 10,257 ang nangaayo human nadugangan og 23  ug nagpabiling 701 ang nakalas.

Samtang ang Mandaue City dunay 230 active cases sa COVID-19 sa ilang

2,936 nga total cases  human dunay nadugang nga 25 ka bag-ong kaso. Ang nangaayo naa sa 2,534 ug 172 ang namatay.

Samtang ang Lapu-Lapu City dunay 115 ka active cases sa COVID-19. Niabot na sab sa 2,805 ang total cases niini kay dunay 10 ka bag-ong nadugang. Naa sa 2,578 ang recoveries ug 112 ang patay.

Sa datos sa DOH-7 ang Central Visayas dunay 27,425 total cases sa COVID-19; 2,531 ang active cases; 23,433 ang recoveries ug 1,461 ang deaths. —Le Phyllis F. Antojado, Decemay P. Padilla/IBM (BANATNEWS)