Mayor Labella mag-“work from home” lang

CEBU, Philippines — Balik-trabaho human nakagawas sa tambalanan si Mayor Edgar Labella kagahapon kinsa naghambin og ear infection, apan mag work from home lang kini subay sa mando sa iyang mga doktor.

Gibutyag sa mayor nga gitambagan siya sa mga doktor nga maglikay una siya ma-expose sa daghang tawo aron dili mosamot ang iyang sakit.

Sumala pa sa public information officer sa Siyudad sa Sugbo nga si Razel Cuizon nga tungod  niini mag “work from home” ang mayor.

Sa social media post ni Labella kagahapon gipahibalo niya nga pipila lang siya ka adlaw nga modistansya sa mga tawo aron makabaton og kaayohan sa iyang sakit.

“My doctor has advised me to stay at home for a few more days so as to minimize contact with people and make a full recovery from the ear infection. So I have been working from home today, catching up on all the paperworks,” suma pa sa mayor.

Nagpasalamat siya sa tanang nag-ampo sa hingpit niya nga kaayohan ug kang Bise Mayor Michael Rama ug sa tanang opisyales sa siyudad nga maoy nidala sa siyudad samtang wala siya.

Una na nga gihimakak sa kampo sa mayor nga na-coma kini.  Suma pa niya nga niarang-arang na ang iyang pamati ug gitiwas na lang niya ang iyang mga nahibilin nga mga antibiotics. —IBM (BANATNEWS)