Zafra: Mga bata dili ipadala sa simbahan

CEBU, Philippines — Nabantayan karon nga adunay mga ginikanan nga magdala gihapon og mga bata sa higayon nga mosulod sa simbahan.

Kini maoy gikabalak-an sa chairman sa committee on public order sa konseho sa Siyudad sa Sugbo Konsehal Philip Zafra.

Si Zafra niawhag kini sa katawhan nga motuman sa health protocols aron malikay sa COVID-19.

Sayo pa, nalatid sa lagda nga 16-anyos hangtud sa 65-anyos ra gyud ang mahimong makagawas sa ilang mga panimalay ubos sa modified general community quarantine (MGCQ) rule.

“Mohangyo lang mi, ayaw intawon dalha ang inyong mga bata sa simbahan. Ato intawon sila ilikay sa COVID-19. Di ta makatugot nga maamong sila sa transmisyon sa virus. Naa gyud baya sa ulahi ang pagbasol”, matud ni Zafra.

Giawhag usab ni Zafra ang mga nagbantay sa gate sa simbahan nga ipatuman gyud ang mga lagda sa quarantine.

Subling giawhag ni Zafra ang higpit nga pagpatuman sa social distancing aron masiguro ang kaluwasan sa mga manimbahay.

Sa pagkakaron 50 porsyento lang sa kapasidad sa mga simbahan ang gitugotang makasulod aron pagsimba.

Ang mga ginikanan gipahimangnoan usab kini nga kong walay makabantay sa ilang mga anak mas labing maayo nga anha na lang mosimba pinaagi sa live streaming.

Nasayran nga kasagaran sa mga parokya karon napahigayon kini og live streaming sa mga Santos nga Misa alang sa paghatag og higayon sa mga indibidwal nga dili pa makagawas sa ilang panimalay.

Si Zafra nagkanahon nga sa sitwasyon karon importante kaayo ang pagsabot.

“Naa pa man ta sa pandemiya, samot na karon nga nagkasaka na pod og balik ang kaso sa COVID-19 dinhi sa atoa”, dugang ni Zafra. —BDB (BANATNEWS)