‘Sunday lockdown’ sa Guadalupe misikad

CEBU, Philippines — Unom ka molupyo sa Barangay Guadalupe sa Cebu City ang nangadakpan tungod sa paglapas sa ‘stay-at-home’ policy nga subling gipatuman sa barangay matag adlaw nga Domingo nunot sa subli na sab pagsaka sa mga kaso sa Covid-19 sa siyudad ilabi na sa ilang barangay.

Ang kapitan sa barangay nga si Michael Gacasan miingon nga mapasalamaton siya sa kooperasyon sa kadaghanan sa mga establisamento pagtahod sa desisyon sa barangay.

Matud ni Gacasan sa Banat News nga dili tanan ang nahimuot sa ilang hukom ilabi na ngano kunong Domingo ra.

“Ingon pas’ uban nganong Sunday ra daw estrikto, Domingo ra ba diay daw naay virus? Domingo among giestrikto kay nakita man namo nga daghan kaayo’g kalihukan kung Domingo, daghan kaayong maglakaw-lakaw, ”pagpasabot pa ni Gacasan.

Samtang sirado ang mga establisemento ang barangay ug lakip na siya ang naghimo og disinfection sa palibot. Plano sa barangay nga buhaton kini sud sa 14 ka adlaw ug agdon ang gidaghanon sa mga bag-ong kaso kun madugangan o makontrolar na.

Sa pagkakaron ang barangay adunay kapin sa 50 ka bag-ong kaso. —IBM (BANATNEWS)