Barangay Guadalupe mag lockdown kada adlaw’ng Domingo
Cebu, Philippines — Tungod sa pagsaka sa kaso sa Covid-19 ang Barangay Guadalupe ning Dakbayan sa Sugbo mopahigayon na usab sa ilang Sunday Lockdown, sugod karon Enero 24, 2021.
Ang social media page post sa Guadalupe Emergency Response Team sila mipasabot nga tungod sa nagsaka nga kaso sa Covid-19 sa ilang barangay (47 aktibong kaso karon) pahugtan nila pagbalik ang pagbantay sa ilang barangay pinaagi Sunday lockdown.
Ang Sunday lockdown nagpasabot nga walay mga residente nga makagawas sa balay nianang adlawa gawas lamang kung sila mga APORs (authorized persons outside of residence) ug kung emerhensiya ang rason sa paggawas sa balay.
Mga food delivery ug uban deliveries makasulod ra hinoon sa maong barangay. Apan ang mga dili residente apan diha nagtrabaho sa kompanyang nagbase sa Guadalupe makasud ug gawas gihapon apan mopresentar sila og COE ug company IDs.
Ang Barangay Resolution 21-012 midesignar sa maong adlaw nga adlaw alang sa disinfection sa mga public areas ug private establishments gawas lamang sa mga botika.
Ang dili magsuot og facemask ug face shields sa tanan establishment pagadakpon.
Sa pikas bahin, dili momenos sa 53 ka mga tawong nakalapas sa quarantine protocols sa dakbayan ang gipaubos sa community service niadtong adlaw nga Sabado pinaagi sa pagpalimpyo kanila sa Mahiga Creek.
Ang pangulo sa Prevention Restoration Orderly Beautification Enhancement kon PROBE Raquel Bohol-Arce miingon nga sagad kanila mga nakalapas sa curfew ug kadtong walay quarantine passes nga naglakaw-lakaw. Walo ka oras ang silot nga gipahamtang kanila apan tungod kay daghan man ug daling mahuman ang trabahoon, sayo silang buhian aorn makauli sa ilaha.
Awhag ni Arce sa katawhan nga mosunod lang gayud sa health ug quarantine protocols nga gipatuman sa siyudad karong panahon nga dunay pandemiya. (BANAT NEWS)
- Latest