10 ngadto 14-anyos di pa pagawson

CEBU, Philippines — Dili pa panahon aron lugakan ang pagpatuman sa higpit nga health protocols pinaagi sa pagpagawas na sa mga batang nag-edad 10-anyos ngadto sa 14 anyos gikan sa mga panimalay sa mga dapit nga ubos sa modified general community quarantine sama sa Cebu City. Ang National IATF miingon nga mahimo nga makagawas ang maong mga edara sa mga lugar nga ubos sa MGCQ, apan si Cebu City Councilor Joel Garganera, kinsa mao sab ang Deputy Chief Implementer for Inter-Agency Task Force Emergency Operations Center sa siyudad  miingon nga dili nila kini itugot dinhi sa siyudad.

Matud sa konsehal karong pagsud ning bulana nagsugod pagsaka og balik ang mga kaso sa Covid-19. Masaligon si Garganera nga kutob ra sa rekomendasyon ug sugyot ang NIATF apan ang mga lokal nga kagamhanan maoy kataposang modesisyon kay silay nasayod sa sitwasyon sa ilang lugar.

Nagtuo ang konsehal nga gituyo kini sa NIATF aron mahinayhinay na og kaanad ang mga tawo sa “new normal” apan sa sitwasyon karon sa siyudad nagtuo si Garganera nga dili pa gyud haom kay nagkataas man balik karon ang mga kaso.

 “Let us also be sensitive sad sa atong kahimtang karon, ato sa ning sulbaron and then puhon rest assured we will entertain that kanang maong lagda, ablihan nato,” sigon ni Garganera.

Base sa datos nga gipagawas sa Department of Health Central Visayas, ang Cebu City nakatala og 60 ka bag-ong kaso sa COVID-19 mao nga karon ang siyudad duna nay 11,635 total cases sa COVID-19.

Gani niabot na sa 702 ang active cases sa Cebu City. Hinoon ang dakbayan nakatala og 47 ka additional reported recoveries mao nga niabot na sa 10,232 ang recoveries sa siyudad ug naa sa 701 ang deaths.

Sa pikas bahin,  giklaro  ni Garganera nga dili  angayan ikabalaka ang pagdaghan karon sa mga pasyenteng gidala sa NOAH Complex sanglit gidugangan  kini  og dugang manpower ug gipalapdan usab ang area.

Nasayran nga dunay 328  ka mga pasyenteng na akaron sa maong complex. Ang NOAH adunay kapasidad nga 360.

Ang NOAH adunay upat ka blocks  ug ang total floor area  moabot ngadto sa 6,593 square meters. Matud pa sa konsehal nga gipangandamn kini sa siyudad ug dili na moburot og maayo ang gidaghanon niini ilabi na nga buksan na og balik karong Lunes ang Cebu City Quarantine Center (CCQC).

Giandam usab sa kagamhanan ang pipila ka Barangay Isolation Centers (BIC). Nagpabilin usab nga abli  ang laing pasilidad diha sa IC3 kun ugaling mosaka gyud ang gidaghanon sa mga kaso.

Gawas sa maong kalamboan , duna puy dugang mga umaablihay nga hotel nga accredited sa Department of Health nga modawat og asymptomatic ug symptomatic nga mga pasyente. Samtang ang mga tambalanan sa siyudad wala pa sa sitwasyon nga angay ikaalarma sa publiko kun makadawat pa o dili na og pasyente. —Sanden J. Anadia/IBM (BANATNEWS)