Pugante napatay kay nisukol sa mga polis

CEBU, Philippines — Patay ang usa ka 41-anyos nga pugante human nisukol mosikop unta kaniya diha sa usa balay nga ilang gitagoan sa Sitio Magsaobay, Barangay Maya sa Lungsod sa Daanbantayan sa miaging gabii.

Ang napatay mao si Mark Muralde, taga Barangay Pasil, Cebu City samtang nadakpan sab ang iyang kapuyo nga si Maureen Galon, 39, kinsa kasohan sab tungod sa pagtabang niini makaeskapo si Muralde gikan sa Cebu City Medical Center diin kini nagpatambal sa sakit.

Si Muralde nag-atubang og kaso tungod sa illegal nga drugas.

Ang operasyon gipahigayon sa mga tinugyanan sa Daanbantayan PNP nga gipangulohan ni Police Captain  Ian Macatangay, mga sakop sa Sawang Calero Police Station sa Cebu City Police Office, 701st Maneuver Company ug RMFB7.

Nakuha sa crime scene ang usa ka caliber .357 revolver adunay tulo ka bala, duha ka fired cartridge cases ug usa ka fired bullet. -- Rowena D. Capistrano/IBM

Pag-estrikto sa health protocols ibalik sa Talisay

Giawhag ni Talisay City Mayor Gerald Anthony “Samsam” Gullas Jr. ang kapulisan nga ibalik ang estriktong pagpatuman sa health protocols human nakita nga nagsaka na sab og balik ang kaso sa Covid-19 sa siyudad ning bulana. Sa Enero 20 nga resulta sa eksaminasyon adunay 65 ka tawo ang nahibaw-an nga nataptan sa makamatay nga virus.  Si Gullas niingon nga dili siya motuo nga kaning mga kasoha tungod pa gihapon sa pagtambong sa Misa de Gallo sa miaging buwan.

Ang iyang pagduda mao ang pagkakumpyansa nasab sa mga tawo nga dili na magsuot og facemask ug wala na mosunod sa social distancing ug naglaag-laag.

Matud sa mayor dili pa panahon sa paglingaw-lingaw ug pagkumpyansa karon tungod naa pa ang pandemiya.

72 kawani gi-swab test

Sa pikas bahin, gipaubos sa swab test ug home isolation ang 72  ka mga kawani sa City Engineer’s  Office (CEO) ug Office of Building Official (OBO)  sa Dakbayan  sa Mandaue nga giingong maoy adunay close contact  sa usa sa mga kawani sa engineering department nga napositibo sa Covid-19. Ang CEO gipaubos sab sa lockdown.

Si Atty. John Eddu Ibañez, executive secretary ni Mayor Jonas Cortes miingon nga kasamtangan karon nilang gipaabot ang resulta sa swab test.

Kun dunay magpositibo magpadayon sila sa contact tracing aron mapugngan ang pagdaghan pa sa mataptan. – Romeo T. Limpangog/IBM (BANATNEWS)