Imahen ni Senior Santo Ñino mobisita sa Bantayan

CEBU, Philippines — Imahen sa Balaan nga Bata Snr. Sto. Nino moabot sa Parukya sa Saints Peter and Paul, Bantayan, Cebu karong adlawa, Enero 21, 2021. Hangtud sa Enero 31, moestar ang imahen sa Senyor sa simbahan tungod usab sa kasaulogan sa ilang pista.

Atol sa pag-abot sa balaan nga bata sa simbahan, sirhan usa kini, ug buksan na kini sa publiko sa adlaw nga Biyernes.

Ang Parukya aduna nay nakahan-ay nga schedules alang sa mga Pilgrimage sa mga parukya nga sakop sa Bantayan Island. Ang parukya buksan gikan sa alas singko sa buntag ngadto sa alas otso sa gabii, ug ang misa nobena magsugod sa alas singko kinse ug alas kwatro y media sa Sabado ug Domingo.

Gihangyo ang mga mobosita sa parukya nga mosunod gihapon sa tanang mga safety protocol kay anaa pa gihapon ang pandemya ug ang makasulod kadto lamang nag edad og 16 anyos hangtod sa 64anyos.

Ang pagbisita sa balaan nga bata sa Bantayan maoy kabahin sa lima ka mga parukya sa probinsya nga gibisita niini apil na ang  Balamban, Boljoon, ug Danao kinsa sa nilabay nga semana sila gibisitahan ug nipuyo sa ilang mga parokya sulod sa pipila usab ka adlaw. —Le Antojado/MEL (BANATNEWS)