Tulo ka HVI sa Cebu City ug Talisay nasikop atol sa buy bust

CEBU, Philippines — Nasikop ang usa ka 23-anyos nga dalaga atol sa gipahigayon nga buy bust operation sa Cebu City Intelligence Unit kagahapon sa kadlawon diha sa Sitio Laguna, Barangay Cogon Pardo, Dakbayan sa Sugbo.

Ang suspetsado mao si Jade Mangitngit kinsa giingong usa ka station level high value individual.

Nangulo sa maong operasyon si Police Lieutenant Colonel Randy Caballes, pangulo sa CIU sa Cebu City Police Office (CCPO). Giingong nasakmit gikan sa suspetsdo ang 45 gramos nga shabu nga nagkantidad tanan ngadto sa P306 mil base sa Dangerous Drugs Board Value ug buy bust money.

Gikataho nga ang suspetsado uyab usab sa usa ka inila nga tawo nga giingong nalambigit usab sa ilegal nga drugas ug natingkagol karon diha sa Cebu City Jail.

Ang kapolisan nihimo pa usab karon og pakisusi sa giingong tinubdan sa ilegal nga drugas sa suspetsado.

Samtang sa Dakbayan sa Talisay, Duha ka HVI ug kauban niini ang nasikop sa gihimong operasyon sa kapolisan sa siyudad niadtong Lunes sa gabii diha sa duha ka barangay sa siyudad.

Unang operasyon gipahigayon diha sa Barangay Tabunok diin nasikop si Gilbert Soquity Gardabay, 43-anyos nga taga Sitio Kabangcalan II, Barangay Bulacao, Pardo, Siyudad sa Sugbo.

Nakuha gikan kaniya ang 6.25 gramos nga shabu nga nibalor tanan ngadto sa P42,500.

Sunod nga operasyon gipahigayon diha sa Sitio Hawod, Barangay Bulacao, Dakbayan sa Talisay.

Nasikop sila si Jandave Dumlao Barro, 20-anyos, taga Sitio Kabayanan, Barangay Bulacao ug si Joselyn Benting Abaya, 38, residente sa Purok Camachili, Barangay Candulawan.

Ang duha nasakmitan og 10.3 gramos nga shabu nga nibalor tanan ngadto sa P70,040.

Ang mga suspetsado natingkagol karon diha sa detention cell sa Talisay City Police Station. —Gabriel C. Bonjoc/BDB (BANATNEWS)