Cebu City nakig-negotiate na sa mga kompaniya sa bakuna

CEBU, Philippines — Gipahibalo kagahapon ni Cebu City Administrator Floro Casas Jr. nga nagsugod na ang ilang paghinabi sa mga kompaniya nga tiggama sa COVID-19 vaccine.

Ang maong mga kompaniya gilangkuban kini sa AztraZeneca, Moderna ug Pfizer.

Matud ni Casas nga usa sa nag-una nila nga ikonsiderar mao ang pagpangita og storage facility nga mahaom gyud sa vaccine.

Samtang ang head sa Cebu City Health Department Dr. Jeffrey Ibones nagkanayon nga dili basta-basta ang pagpangita og storage facility aron mapreserba ang kalidad sa vaccine.

Labing importante sa tanan nga aprobado kini sa Food and Drug Administration ingon man usab sa World Health Organization.

Matud ni Ibones nga adto lang ipahigayon sa health centers o ubang health facilities ang pagturok sa vaccine diin pinasubay sa rekomendasyon sa Department of Health.

Samtang ang kagamhanan sa Dakbayan sa Mandaue nag-umol kini og COVID-19 vaccine board. Matud ni Mayor Jonas Cortes nga ang giumol nga committee maoy tahasan sa pagpahapsay sa pagpahigayon og bakuna diha sa 27 ka barangay sa siyudad diin subayon ang priority sector sa katilingban.

Ang COVID-19 vaccine board pangulohan kini ni Kapitan Ernie Manatad sa Barangay Subangdaku ug presidente sa Association of Barangay Council (ABC) langkuban usab sa pangulo sa City Health Office, Emergency    Operation  Center,  City Administrator’s Office,  Management Information System Office ug City Budget  Office.

Ang kagamhanan sa dakbayan kasamtangan usab nga nakiglambigit sa Mandaue City Chamber of Commerce and Industry (MCCI).

Dugang ni Cortes nga pinaagi unya sa Public Private Partnership (PPP) posible nga kamenosan pa ang kantidad sa ilang appropriation nga ipalit og bakuna tungod kay naa  ang private sector nga motabang sa pagpatuman sa maong programa. Sa laing bahin, Si Archbishop Jose Palma sa Archdiocese of Cebu niawhag sa katawhan nga dili angay nga mahadlok ug mas maayo nga mo-avail sa bakuna.

Matud ni Palma nga nakig-alayon pa sila sa mga Local Government Unit may kalabotan sa protocols alang sa mga bakuna. —Romeo T. Limpangog, Rowena D. Capistrano/BDB (BANATNEWS)