Gullas malaumon nga makapasar sa DILG bahin sa road clearing

CEBU, Philippines — Nahawan na ang mga tindahan ug ilegal nga estraktura nga nitungtong sa sidewalk sa Dakbayan sa Talisay apan gipulihan sab kini sa mga sakyanan nga diha nalang magparking. Kini maoy naobserbahan human sa gihimo nga road clearing operation sa mga sakop sa task force.

Hinoon si Edwin Nierves, pangu sa task force niingon nga makig alayon sila sa mga opisyales sa barangay aron sila na mismo ang motawag sa taga City of Talisay-Traffic Operation Development Authority (CT-TODA) aron matagaan kini og aksyon.

Si Nierves ug ang iyang sakop padayon sa paghimo sa road clearing operation sa tanang barangay sa siyudad.

Iyang gipasalig nga bisan pa og wala nay evaluation sa taga Department of Interior and Local Government (DILG) ipadayon gihapon nila ang pagmonitor kung namalik ba o wala ang mga ilegal nga estraktura.

Si Mayor Gerald Anthony “Samsam” Gullas Jr. masaligon nga sila makapasar sa himuon nga pagsusi sa taga DILG karong semanaha.

Ang taga DILG molibot sa nagkadaiyang barangay sa Talisay aron sutaon kung nituman ba sila sa kamanduan. —MEL (BANATNEWS)