7 ka durugista sikop sa Dakbayan sa Talisay

CEBU, Philippines — Pito ka durugista ang nadakpan sa kapulisan sa Dakbayan sa Talisay sa gihimo nga tulo ka adlaw nga sunod-sunod nga operasyon. Ang mga dinakpan mao sila si Daryl James Pegar Tagalog; Hyco Fernandez Sugaton; Gilbert Padilo Baculpo; Rolando Dela Peña Santillanas; Georgie Romayrat Cagulada; Jotha Romayrat  Cagulada ug si Clarence Filamor Menchavez.

Nakuha nga ebedensya moabot sa 7.2 gramos ang timbang nga adunay gibana-bana nga balor nga P48, 960.

Gawas sa operasyon sa ginadiling drugas, 14 sab ka indibidwal ang nasikop gumikan sa ilegal nga sugal, 63 ka indibidwal ang nakalapas sa curfew ug wala pagsul-ob og facemask.  Sa laing bahin tinguha sa Dakbayan sa Talisay nga himuon nasab nga drug-free ang Barangay Campo 4  human ang barangay Tapul gideklarar na sa Philippine Drug Enforcement Agency (PDEA) nga limpyo na sa ginadiling drugas. Apan si Dr. Rey Cesar Bautista sa After Care Program niingon nga dili gihapon angayan nga mokumpyansa tungod kay mao kini ang sinugdanan sa dakong hagit.

Suma pa ni Bautista nga ang paghatag og kalingawan sama sa livelihood program sa mga tawo mao ang dakong tabang aron kalikayan nila ang dili maayong bisyo.

Drug Rehab

Dul- an sa 1000 ka mga indibidwal ang mipaubos og community based-drug rehab program nga nagikan sa nagkadaiyang barangay sa Siyudad sa Sugbo. Suma pa sa hepe sa Cebu City Office of Substance Abuse Prevention (COSAP) nga si Jonah John Rodriguez nga dunay matag semana nga session ug seminar ang mga nagpa-enrol niini ug molungtad og unom ka buwan ang rehabilitasyon.

Matud pa ni Rodriguez nga pipila sa ilang mga kliyente mga drug surrenderees nga nagikan sa listahan sa Philippine National Police ug Philippine Drug Enforcement Agency.

Gani sa miaging adlaw, duna silay gibuhat nga “home visitation” alang sa mga tawo nga nalakip sa drug watch list sa PDEA ug PNP ug gidasig kini nga mopaubos sa ilang rehab program. —Sanden J. Anadia/MEL (BANATNEWS)