Palma: Santo Niño wala nibiya bisan sa hagit sa pagtuo

CEBU, Philippines — Si Archbishop Jose Palma sa Archdiocese of Cebu maoy nangulo kagahapon sa buntag sa misa pontipika alang sa ika-456th Fiesta Senior uban sa tema nga  “Sto. Niño the Abiding Presence of the Father in Our Journey of Faith”.

Matud ni Palma nga bisan sa pandemiya gihigugma gihapon kita sa Ginoo diin ang Santo Niño wala nibiya bisan sa taliwala sa mga hagit sa atong pagtuo.

Gidasig ni Palma ang katawhan nga susama ug kinaiya sa usa ka bata aron makabaton sa gingharian sa Ginoo.

Giawhag usab ni Palma ang mga magtutuo subay sa ika-500 years sa Kristyanismo nga adunay tema nga “gifted to give” sa pagpaambit sa ilang mga grasya ngadto sa mga kabus, sinalikway ug dinaugdaog diha sa ilang komunidad.

Bisan unsa nga klase sa pagpaambit dako na kaayo kining grasya alang sa mga tawo nga mas labing nanginahanglan.

Nunot niini, gipahibalo ni Palma nga aron dili na maghuot ang katawhan sa probinsiya dinhi sa Dakbayan sa Sugbo adunay imahen sa Santo Niño diha sa mga parokya sa mga lungsod sa  Boljoon, Ronda, Balamban, Danao ug sunod semana ngadto sa Bantayan Island. Sayo pa, nalandig sa pribado nga tambalanan si Palma human sa gipamati niya sa lawas gumikan sa ka busy niini sa nilabay nga holidays hinuon sa usa ka adlaw lang siya aron makapahuway ug makapa-checkup sa iyang panglawas.

Sa laing bahin, bisan sa kalisod sa kahimtang tungod sa pandemiya wala kini makapahuyang sa mga Sugbuanon nga maghikay bisan ginagmay alang sa pagpasalamat kang Senior Santo Niño.

Pipila ka mga barangay sa Siyudad sa Sugbo aduna gyu’y ginagmay nga hikay ang matag panimalay. —BDB (BANATNEWS)