Bata nga bag-ong natawo gibiyaan sa kasagbutan

Cebu, Philippines — Usa ka iro ang nakatabang aron maluwas ang usa ka bata nga bag-o pang natawo nga  gibiyaan sa kasagbutan sa Barangay Magkagong,bukirang bahin sa Lungsod sa Sibonga niadtong Huwebes.

Matud pa ni Police Master Sergeant Venus Tampos, WCPD PNCO, nga dunay mipahibawo kanila nga dunay batang lalake nga bag-ong gianak nga gibilin sa kasagbutan.

Gidugang ni Tampos, usa ka Johnryl Revilla, kinsa nagmaneho sa iyang motor ang gisundan ug iro nga susama ug nagpakitabang, hinungdan nga iyaha kining gikanaug ug sa iyang pagsunod sa iro iyang nakit-an ang batang lalaki nga bag-o pa gihimugso nga giputos og brown nga tuwalya.

Ang maong bata gidala sa tambalanan ug ubos na sa kustodiya sa Municipal Social Welfare and Development Office.

Padayon pang gisusi sa kapulisan kun si kinsa ang inahan sa bata, apan sila nagtuo nga residente ra sa maong lugar ang inahan. Awhag sa kapulisan sa mga molopyo sa pagtaho gilayon sa ilang buhatan kung aduna silay makit-an nga babaye nga bag-ong nanganak ug walay bata nga gialima. Nasayran ang kapolisan sa Sibonga nihimo ug mga house visitation kun pagbisita sa kabalayan aron pagpahinumdum sa kabatan-onan nga magmatngon kanunay aron malikayan ang teen age pregnancy, ilabi na daghan karon ang naa nagyampungad sa social media. (BANAT NEWS)