Mandaue nigahin og P200 milyones alang sa COVID-19 vaccine

CEBU, Philippines — Mokabat sa P200 milyones ang gigahin sa kagamhanan sa Dakbayan sa Mandaue sa pagpalit og Covid vaccine.

Si Atty. John Eddu Ibañez, executive secretary ni Mayor Jonas Cortes, niingon nga gireserba lang ang maong gahin sa pagdugang unya sa panginahanglan sa vaccine sa nasudnong kagamhanan.

“With regards to brand wa pa ta," matud ni Ibañez.

Gipahibawo sab ni Ibañez nga gipangayo na sa nasudnong kagamhanan ang gidaghanon sa mga hataganan sa bakuna nga naglakip sa mga senior citizens, frontliners, mga bata ug mga magtutudlo.

Samtang subli nga nanawagan si Konsehal Alvin Dizon aron ang Dakbayan sa Sugbo mohimo og comprehensive plan may kalabutan sa Covid-19 vaccination.

Matud ni Dizon nga ang dakbayan nangandam alang sa pagpalit og bakuna apan hangtud karon wala pay klaro nga plano kung unsaon ang pag-apod-apod niini. Dugang pa ni Dizon nga base sa survey nga iyang nalantaw, pipila lang usab ka tawo ang andam magpabakuna tungod kay ang uban dili segurado magpabakuna.

Ang konsehal nibutayg nga kinahanglan kaayo sa konseho ang pagpasar og ordinansa nga maglatid sa mga prayoridad sa Covid-19 vaccine. —Rowena D. Capistrano/GMR (BANATNEWS)