Quarantine guidelines sa Cebu City hingusgan pagbalik

CEBU, Philippines — Si Konsehal Joel Garganera, deputy chief implementer sa Inter-Agency Task Force Emergency Operations Center Cebu City nagkanayon nga atol sa Misa de Gallo ug sa holiday season nilugak ang Cebu City sa pagpatuman sa quarantine guidelines.

Ug karon nga nahuman na ang maong mga kasaulogan ang mga barangay ug kapolisan naglisod aron mausab ang kinaiya sa mga tawo hinungdan nga hingusgan nila pagbalik ang pagpatuman sa quarantine guidelines.

Karong adlawa makig-meeting si Garganera tali sa pipila ka barangay aron masayod ang EOC sa sitwasyon sa ilang lugar.

Nabantayan usab nga daghang mga residente sa Cebu City ilabi na sudlonon nga bahin sa barangay ang giingong wala na magsul-ob og face mask.

Gihulagway ni Garganera nga dako og natabang ang Task Force Kasaligan sa pagpatuman sa health and safety standard ilabi na ang kapolisan sa siyudad hinungdan nga nangita og paagi ang siyudad nga mapadayon ang serbisyo.

Sa laing bahin, si Garganera makigtagbo karong buntag sa top10 barangay nga adunay taas og kaso sa COVID-19.

Matud ni Garganera nga atol sa meeting mohimo sila og assessment alang sa interventions nga buhaton. Apil usab sa maong tigom ang mga station commander sa maong mga barangay.

Gibutyag ni Garganera nga sa 80 ka barangay sa siyudad 32 na lang ang walay kaso sa COVID-19 sulod sa 14 ka adlaw.

Samtang sa Dakbayan sa Naga nikabat ngadto sa 127 ka tawo kinsa nakalapas sa health protocola ang nadakpan ug gipaubos sa seminar sugod niadtong Enero 4 ning tuiga.

Si Mayor Kristine Vannesa Chiong nakigtigom sa Covid Task Force ug nipadayag nga ipadayon ang nasugdan nga trabaho. Ang wala motuman sa physical distancing niabot ngadto sa 71 nga kasagaran overloading sa pagsakay og sakyanan ug wala magsul-ob og face mask nga naa sa 44 ang gidaghanon samtang 12 ang nadakpan sa curfew. —Rowena D. Capistrano, Gabriel C. Bonjoc/BDB (BANATNEWS)