Probinsiya sa Sugbo labing datu nga lalawigan

CEBU, Philippines — Ang Probinsiya sa Sugbo sa ika-unom nga higayon nagpabiling labing adunahan nga lalawigan sa tibuok Pilipinas.

Base sa Annual Financial Audit Report sa Commission on Audit (COA) sa tuig 2019, nasuta nga ang Probinsiya sa Sugbo adunay P203.9 bilyones nga assets diin gisundan kini sa Probinsiya sa Batangas nga adunay assets nga P20.79 bilyones, Ikatulo ang Rizal nga adunay assets nga P20.28 bilyones, Davao de Oro nga adunay P20.10 bilyones nga assets ug Bukidnon nga adunay P18. 29 bilyones nga assets.

Apan si Gobernador Gwendolyn Garcia nagkanayon nga imbes ipanghambog kini mga titulo gikonsiderar niya kini nga hagit sa habig sa Kapitolyo.

Si Garcia nagkanayon nga tungod niini, mas angay nga daghan ang malampos sa probinsiya nga mga programa ug proyekto sama sa inprastraktura.

Sukad sa iyang paglingkod isip gobernador nahimong prayoridad ni Garcia ang pagpakonkreto sa mga provincial ug barangay roads nga subay sa national standard ang sukod.

Base sa report sa Provincial Engineering's Office, sukad niadtong tuig 2019 hangtud karon niabot na ngadto sa 65.2 ka kilometro nga provincial roads ang nakompleto na ang pagkonkreto ug nagpadayon ang      trabaho.

Ang barangay roads, niabot na usab sa 154 kilometro gikan sa sobra sa kinatibuk-ang 800 ka kilometro.

Tinguha ni Garcia nga 80 ngadto sa 90 porsyento niini ang makompleto sa iyang termino pagka-gobernador.

Giingong sa P15 bilyones nga pundo sa Probinsiya sa Sugbo karong tuiga, P8 bilyones niini ang gigahin alang sa inprastraktura.

Base usab sa COA financial report, ang Cebu City ug Mandaue City maoy ika-lima ug unom nga labing adunahan nga siyudad sa nasud.

Ang Cebu City adunay total assets nga P34.71 bilyones samtang ang Mandaue aduhnay P32.16 bilyones.

Ang Makati City maoy top 1 sa pinakadatu nga siyudad sa Pilipinas diin aduna kini P233.78 bilyones nga total assets. —BDB (BANATNEWS)