Sakop sa TEAM gipaubos sa drug test
CEBU, Philippines — Gisiguro sa bag-ong miasumer sa katungdanan isip executive director sa Traffic Enforcement Agency of Mandaue (TEAM) nga si Edwin Jumao-as nga walay malambigit sa paggamit og ilegal nga drugas sa iyang mga sakop.
Kini maoy hinungdan nga iyang gipaubos sa random drug test ang 200 niya ka mga sakop gikan sa 244 nga kinatibuk-ang gidaghanon nga mga personnel niadtong miaging adlaw Enero 13, 2021.
Ang buhatan sa City Anti-Drug Abuse Council (CADAC) sa maong dakbayan maoy nagdumala sa random drug test nga gipili pinaagi sa computer-based random date generator.
Si Jumao-as miingon nga ang iyang gihimo mao ang pagpatawag og meeting sa iyang mga traffic personnel ug gihimo gilayon ang random drug test.
“Atong katuyoan nga kinahanglan nga ang personnel sa TEAM free sa drug kay lisod man na naa siya sa drugs ug ang iyang trabahao naa sa dalan," nagkanayon si Jumao-as.
Gitataw niya nga ang personnel nga nalambigit sa ilegal nga drugas lisod nga makahimo sa pagtuman sa iyang kaakohan sa paghapsay sa kahimtang sa kadalanan.
Ang personnel nga masuta nga positibo sa illegal nga drugas iyang isumitir ang pangalan ngadto sa ilang higher committee alang sa pagpaubos niini sa due process. —MEL (BANATNEWS)
- Latest