Mga armas nasakmit atol sa buy bust sa danao police
CEBU, Philippines — Nasakmit sa kapolisan sa Danao ang pipila ka armas atol sa gihimong buy-bust operation diha sa Sitio Catadman, Barangay Sabang, Dakbayan sa Danao. Sa gihimong joint operation sa Danao City Police Station ug mga sakop sa Criminal Investigation Detection Group (CIDG) 7nasikop si Larry Beduya alyas Andot, 49 anyos nga nagpuyo sa maong dapit.
Nakuha ang mga armas nga gilangkuban sa tulo ka kalibre 45 ug upat ka magazine niini nga adunay mga bala.
Samtang usa ka high value individual ang nasikop sa buy-bust operation sa drug enforcement unit sa Labangon Police diha sa Santa Teresita Village, Brgy. Tisa, Cebu City Sabado sa gabii.
Ang dinakpan mao si Harold Empiso Arcega 43 anyos. Nakuha sa iyang posisyon ang gituhuang shabu nga mitimbang og 45 grams nga mikantidad og P306, 000.
Laing mga nasikop sa illegal nga drugas mao ang usa ka tattoo artist ug construction worker didto sa sitio Kilawan, Barangay Tanke, Dakbayan sa Talisay niadtong Sabado sa gabii.
Ang mga nadakpan mao sila si Jhune Rex Cuizon Magbanua, 35 anyos nga taga barangay San Roque ug si Felimon Cabo Bacus, 52 anyos nga taga sitio Kilawan, barangay Tanke.
Samtang ang Presinto 3 sa Lapu-Lapu City Police Office (LCPO) kauban sa mga sakop sa Regional Intelligence Unit (RIU) 7 milampos usab pagdakop sa suspetsadong tulisan sa Purok Kapayas, Barangay Canjulao sa Dakbayan sa Lapu-Lapu.
Giila ang dinakpan nga si Christian Dave Panilagao, hingkod ang panuigon nga nagpuyo sa maong dapit.
Gidakop ang suspetsado pinasikad sa warrant of arrest nga giluwatan sa korte sa kasong pagpanulis og dunay piyansa nga P18, 000 alang sa iyang temporaryong kagawasan. Romeo Marantal/Gabriel C. Bonjoc/MEL (BANATNEWS)
- Latest