Cebu City ipabalik sa GCQ

CEBU, Philippines — Hayan morekomendar si Cebu City Mayor Edgardo Labella nga ibalik sa general community quarantine ang siyudad karong Pebrero.

Kini sa higayon nga magpadayon ang pagsaka sa kaso sa coronavirus disease (COVID) 2019.

Apan giklaro ni Labella nga mangayo siya og opinyon sa mga medical experts sa dili pa mohimo sa maong lakang.

“I would not just do it unilaterally without seeking the advice of the medical experts, the Department of Health for certainly,” sigun ni Labella.

Ang siyudad gipaubos sa modified GCQ sukad niadtong Septiyembre sa niaging tuig. Niadtong Biyernes base sa gipagawas nga datos sa Department of Health 7, ang Dakbayan sa Sugbo nakatala og 46 ka bag-ong kaso sa COVID-19 hinungdan nga 277 na ang tanang active cases sa pagkakaron.

Giangkon ni Konsehal Dave Tumulak nga gibati siya og kabalaka niining pagsaka sa kaso sa COVID-19 sa Siyudad sa Sugbo.

Kini maoy hinungdan nga giawhag ni Tumulak ang mga deboto sa Señor Santo Niño nga kun mahimo adto motambong sa Santos nga Misa pahinungod sa Balaang Bata sa ilang tagsa-tagsa ka simbahan.

Matud sa konsehal nga ang matag simbahan dunay gigahin nga oras alang sa misa novena sa kapistahan sa Señor Santo Niño. “Dili man mawala ang atoang pagtuo ug pagsalig bisan pa man og dili ta kaadto sa Basilica Minore del Sto. Niño,” matud ni Tumulak. Niadtong Biyernes sa gabii namatikdan nga wala na mosunod sa social distancing ang mga tawo nga nagpaabt sa sunod nga misa gawas sa Basilica.

Nunot niini si Labella nimando sa kapolisan ingon man sa mga force multipliers nga magpabilin hangtud sa katapusang misa sa Basilica aron maseguro nga masunod gihapon ang minimum health protocols ilabi na ang social distancing.

Hangyo sa mayor sa mga deboto nga unta mosunod sa lagda nga gipagawas sa siyudad aron malikayan ang pagkatap sa COVID-19.

Nangandam

Gibutyag sab ni Labella nga gimanduan na niya ang Cebu City Health Department ug Emergency Operations Center nga mangandam kun pananglitan ang kaso sa COVID-19 magpadayon sa pagsaka.

Sigun pa niya nga giandam na nila ang pasilidad sama sa Cebu City Quarantine Center, NOAH Complex ug Barangay Isolation Centers ingon man ang mga tambalanan aron pagtubag sa problema kun kini mahitabo.

Sa niaging 14 ka adlaw, 37 nalang ka barangay sa Dakbayan sa Sugbo ang walay kaso sa COVID-19.

Awhag sa chief implementer sa EOC, Konsehal Joel Garganera, sa katawhan nga padayong mosunod sa mga gipatuman nga social distancing aron malikayan ang COVID-19.

Nisaka sab

Sa pikas bahin nagguol si Talisay City Mayor Gerald Anthony “Samsam” Gullas Jr. human nisaka na sab ang kaso sa COVID-19 sa dakbayan.

Sa natala sa DOH-7 niadtong Enero 7, nibalik sa 25 ka tawo ang aktibong nakakuha sa virus human dugang lima ang bag-ong kaso diin tulo gikan sa Barangay Dumlog, usa sa Lawaan 1 ug usa sab sa Lawaan 2. Kasagaran kanila adunay mga simtomas nga nataptan sa virus.

Si Gullas nagkanayon nga base sa contact tracing team ang pagtapok-tapok sa panahon sa Pasko ug Bag-ong Tuig maoy hinungdan.

Si Gullas nihangyo na sab sa katawhan nga buhaton ang ang lagda batok sa COVID-19 sanglit alang kini sa kaayuhan sa tanan. —Rowena D. Capistrano, Gabriel C. Bonjoc/GMR