LTFRB dunay ‘pito ka sugo’ sa mga PUV

CEBU, Philippines — Nipagawas ang Land Transportation Franchising and Regulatory Board og advisory alang sa mga public utility vehicle (PUV) operators may kalabutan sa pag-implementar sa “7 commandments” batok sa Covid-19.

Si LTFRB-7 regional director, Col. Eduardo Montealto Jr., niluwat sa memorandum aron sa pagpahinumdum sa tanang pasahero, drivers, operators ug conductors nga motuman sa pito ka sugo batok sa pagkatap sa Covid-19. Ang pito ka kamanduan mao ang pagsul-ob og face mask ug face shield, gidili ang pagpakigtabi, pag-estorya ug pagtubag og tawag sa cellphone, ug gidili ang pagkaon sulod sa sakyanan.

Kinahanglan nga adunay sakto nga ventilation, kanunay ang disinfection, gidili ang pagpasakay og symptomatic nga pasahero ug ang ikapito mao ang pagsunod sa tukma nga physical distancing nga one seat apart.

Ang kamaduan sa LTFRB-7 giluwatan niadtong Huwebes nga kinahanglan sundon sa tanang hingtungdan aron dili mag-atubang og multa sa mga kalapasan nga mahimo.

Samtang gipahimangnoan ni Lapu-Lapu City Mayor  Junard “Ahong” Chan ang mga public utility jeepney (PUJ) ug mga tricycle drivers nga kuhaan sa ilang lisensiya kun madakpan sa akto sa paglapas sa minimum health protocols.

Susamang kamanduan sab ang giluwatan ni Mandaue City Mayor Jonas Cortes ngadto sa mga traffic enforcers sa pagdakop ug pagbayad og multa alang sa mga tricycle drivers nga makalapas sa “one passenger policy”.

Si Chan niingon nga daghan na siya og nadawat nga mga reklamo sama sa overloading nga dili na matuman ang social distancing.

Laing reklamo mao ang pagdoble sa plitehan sa mga pasahero sa mga PUJ ug tricycle bisan sobra na ang pasahero.

Susama sab nga reklamo ang nadawat ni Cortes hinungdan sa iyang kamanduan sa mga sakop sa Traffic Enforcement Agency of Mandaue (TEAM) sa pagsikop sa tricycle drivers nga pakyas sa pagtuman sa social distancing.

"Ang nakapait gud kay bisan og dili na tagsa ka pasahero ang ilang gikarga, nagpabilin gihapon ang plitehan," nagkanayon si Cortes

Matud ni Cortes nga nakasabot siya sa mga drayber sanglit panginabuhi kini apan sab makiangayon ang ilang gihimo ngadto sa mga pasahero.

Nunot niini iyang gimando ang pagpasiugda og checkpoint sa mga rota sa mga tricycle aron masikop kadtong malapason sa safety health protocols batok sa COVID-19. —Romeo T. Limpangog/GMR (BANATNEWS)