Habig sa taytayan sa Mananga siradohon

CEBU, Philippines — Gikatakdang siradohan na usab ang pikas habig sa taytayan sa Mananga diha sa Barangay Tabunok, Dakbayan sa Talisay sulod sa tulo ka adlaw.

Si Jonathan Tumulak, hepe sa City of Talisay-Traffic Operation and Development Authority (CT-TODA) nagkanayon nga trabahuon sa Department of Public Works and Highways (DPWH) ang retrofitting sa maong taytayan aron kini molig-on.

Gikan sa alas 8:00 sa buntag sa adlaw nga Sabado hangtud sa alas 5:00 hapon sa adlaw nga Lunes sunod semana himuon ang pagtrabaho.

Matud ni Tumulak nga ang habig paingon sa amihanan ang trabahuon hinungdan nga ang paingon sa habagatan temporaryo kining himuon nga two-way lane ug alang lang kini sa mga light vehicle.

Ang mga dagko nga sakyanan giawhag nga adto moagi sa Cebu South Coastal Road (CSCR) aron dili na makatampo sa kahuot sa karsada.

Si Tumulak nidugang nga kong mahimo planohon daan sa mga motorista ang ilang mga lakaw aron dili na maapil sa kahinay unya nga dagan sa trapiko. —BDB (BANATNEWS)