Mga nibiyahe gikan sa Manila ipaubos sa istriktong quarantine
CEBU, Philippines — Gipahibawo ni Mayor Edgardo Labella kagahapon nga i-istriktohon gyud ang pagpatuman sa 14 ka adlaw nga quarantine alang sa mga nibiyahe gikan sa Manila paingon dinhi sa Cebu City.
Kini human nitumaw ang report nga adunay taga Manila nga nilarga ngadto sa Hong Kong ang giingong na-detect nga nagpositibo sa bag-ong variant sa COVID-19.
Matud ni Labella nga dili kini angayan nga kompiyansahan hinungdan nga aduna nay lapad nga koordinasyon ang kagamhanan sa siyudad ngadto sa mga tinugyanan sa Mactan Cebu International Airport (MCIA) aron masiguro ang pag-monitor sa mga nanglarga gikan sa Manila.
Gipaandam na usab ni Labella ang Cebu City Quarantine Center aro diha i-isolate ang mga nataptan sa maong virus.
Nasayran nga ang maong bag-ong COVID-19 variant unang na-detect ngadto sa United Kingdom ug nakasulod na sa pipila ka mga nasud sama sa Switzerland, South Africa, Denmark, Israel, Hong Kong, Spain, Ireland, Netherlands, Singapore, Lebanon, Japan, Canada, Germany, Sweden, Australia, France, Iceland ug South Korea.
Mao kini ang hinungdan nga gidid-an na nga makasulod sa Pilipinas ang mga nagikan sa maong mga nasud sugod niadtong Disyembre 29, 2020.
Sayo pa, si Labella nipadayag kini nga kon ugaling mokuyanap ang bag-ong COVID-19 variant, dili total lockdown ang iyang iimplementar apan granular lockdown lang aron dili mapiang og samot ang ekonomiya.
Si Health Secretary Francisco Duque III namahayag kini nga mas paspas makatakod ang bag-ong coronavirus variant apan parehas ra gihapon kini og epekto sa COVID-19. —BDB (BANATNEWS)
- Latest
