Mga durugista ug sugarol sa Talisay ug Barili nasikop

CEBU, Philippines — Siyam ka suspetsadong durugista ang nadakpan sa gihimo nga sunod-sunod nga operasyon sa kapolisan diha sa Sitio Hawod, Barangay Bulacao, Dakbayan sa Talisay kagahapon sa kadlawon.

Si Police Lieutanant Colonel Gerard Ace Pelare, hepe sa Talisay City Police Station nibutyag nga mga 1:45 sa kadlawon nisikop nila si Enrique Bernal Canlobo; Manuel Entero Medina; Eduardo Mayorga Almario ug ni Anavie Nable Delgra.

Ang mga suspetsado nasakmitan kini og shabu nga nitambang ngadto sa 6.25 gramos ug nikantidad tanan ngadto sa P43,500.

Pagka-alas 2:00 sa kadlawon, nasikop sila si Ricky Cabillin Abalo, usa ka high value target ug Junde Alcansado Capablanca.

Ang mga suspetsado nasakmitan kini og shabu nga nibalor tanan ngadto sa P23,460.

Sunod nga nasikop sila si Paul Boniao Iway, Santos Bacalso Gicale III ug si Kiessa Mae Badayos.

Ang mga suspetsado natingkagol karon diha sa detention cell sa Talisay City Police Station.

Sa laing bahin, nikabat sa 11 ka tawo nga adunay warrant of arrest kalabot sa ilegal nga tigbakay ang nasikop sa kapolisan sa Lungsod sa Barili.

Ang operasyon batok sa mga suspetsado gipangulohan ni Police Captain Romeo Caacoy Jr., hepe sa Barili Police Station.

Ang mga nasikop naggikan kini diha sa nagkalain-laing lugar sa lungsod kinsa nakaikyas atol sa pagpangronda sa kapolisan ug napasakaan og kaso hinungdan nga nalutsan kini og warrant of arrest sa korte.

Pipila usab ka opisyal sa barangay kinsa maoy nagpasiugda sa kalihokan ang nasikop. —Rowena D. Capistrano/BDB (BANATNEWS)