Kadalanan ug kasapaan sa Cebu, Mandaue ug Talisay pahawanan
CEBU, Philippines — Si Cebu City Councilor Jerry Guardo, chairman sa committee on infrastructure nagkanayon nga ang clearing operation nga ilang gihimo diha sa kasapaan sa siyudad kabahin kini sa programa ni Mayor Edgardo Labella nga maghatag og long term solution sa problema sa baha sa dakbayan.
Tumong sa kagamhanan sa siyudad uban sa Department of Public Works and Highways (DPWH)-7 nga mapalapdan ug mapalawoman ang sapa.
Si Guardo nagkanayon nga na-identify na nila ang mga balay nga maapektohan sa clearing operation ug napasabot na usab nila ang mga tag-iya niini sa tumong sa siyudad ug gani adunay uban ang nakadawat na og financial assistance ug dunay pipila ang ni-avail sa relocation site.
Ang mga barangay nga pahigayonan og clearing operation mao ang Tinago diin 48 ka balay ang maapektohan, Tejero, 22 ka balay, Pasil, 20 ka balay ug sa Mambaling, 18 ka balay.
Samtang sa Dakbayan sa Mandaue, gipahibalo sa buhatan sa Mandaue City Enforcement Unit (MCEU) ang pagbalik sa road clearing operation nga gikatakda ugma.
Si Edwin Jumao-as, pangulo sa MCEU nagkanayon nga ilang nasuta sa pre- inspection nga ilang gihimo nga daghan ang nakaali sa mga dalan diin kasagaran niini mao ang ilegal parking sa mga sakyanan diha sa gawas sa mga establisamento.
Gibutyag ni Jumao-as nga unang lakang nga ilang himuon sa ilang pagbalik sa road clearing operation mao ang paghatag sa mga tag-iya sa establisamento og final notice.
Sa laing bahin, gipahinumduman ni Mayor Gerald Anthony “Samsam” Gullas Jr. sa Dakbayan sa Talisay ang tanang opisyales sa barangay nga lihokon na ang pagpahigayon sa road clearing.
Si Liza Fernandez, pangulo sa Department of Interior and Local Government sa siyudad nakigkita na sa mga kapitan sa 22 ka barangay aron lihokon na ang kamandoan sa DILG sa paghawan sa mga karsada. – Romeo T. Limpangog, Gabriel C. Bonjoc/BDB (BANATNEWS)
- Latest