Garganera: Pagsaka sa kaso sa COVID-19 dili alarming
CEBU, Philippines — Dili alarming ang pagsaka sa kaso sa Corona Virus Disease (COVID)-2019 sa Cebu City kini suma pa ni Konsehal Joel Garganera, Deputy Chief Implementer for Inter-Agency Task Force Emergency Operations Center Cebu City.
Apan padayon nga gipahinumduman ang publiko nga mosunod lang gihapon sa basic health protocols sama sa social distancing, pagsul-ob og facemask ug face shield.
Si Konsehal Garganera miingon nga napanglantawan na nila ang pagsaka sa kaso sa COVID-19 sa Cebu City gumikan sa grabeng lihok sa mga tawo niadtong buwan sa Disyembre hinoon gipasalig nila sa publiko nga ang Cebu City Government ug Healthcare personnel andam niini.
“These are expected, dili man ko mo-worry because more than half of these are close contact in other words una pa nigawas ilang resulta ato naman ni silang na-lockdown, contact trace, they’re just waiting for the result”, suma pa ni Konsehal Garganera.
Base sa datos sa Department of Health Central Visayas gikan sa Disyembre 29, 2020 hangtud sa Enero 3, 2021 ang siyudad nakatala og double digits sa kaso sa COVID-19. Niadtong Enero 3, adlaw’ng Dominggo ang active cases sa Cebu City sa COVID-19 niabot na og 167 human nakatala og 16 ka bag-ong kaso ug niabot na sab sa 10, 882 ang total cases sa siyudad.
Hinoon gihulagway ni Garganera nga ang siyudad naa sa maayong sitwasyon sa pag-handle sa pagsaka sa kaso itandi sa buwan sa Hunyo ug Hulyo sa miaging tuig ug nangandam sab sila niiining pagtumaw sa bag-ong variant sa COVID-19. —MEL (BANATNEWS)
- Latest
