Novena Mass sa Basilican magsugod Enero 8

CEBU, Philippines — Karong Biyernes, Enero 8 magsugod ang unang adlaw sa novena mass diha sa Basilica Minore del Sto. Niño diin kabahin kini sa kalihukan sa simbahan subay na sa kapistahan sa Balaang Batang Senyor Sto. Niño.

Subay sa maong kalihukan nagtagbo kapulisan, kadagkuan sa Basilica, Emergency Operations Center Cebu City pinangulohan ni Konsehal Joel Garganera uban si Konsehal Phillip Zafra, ug ang CCDRRMO nituki sa pagpangandam nga himoon.

Si Garganera miingon nakita gyud nila nga dunay problema sa lugar gumikan sa social distancing hihungdan nga dunay mga lugar nga gitan-aw nga mahimong butangan og LED monitors aron maakomodar ang mga tawo.

Gitan-aw sab nila magbutang og LED ug sound system sa Plaza Independencia ingon man sa Senior Citizens Park aron dili magdasok diha sa basilica ang mga tawo.

Sa mga dili residente sa Cebu City si Garganera miingon nga giawhag nila ang mga simbahan sa ubang Local Government Units nga dunay open space kun pwede mohimo og virtual mass live gikan sa basilica aron dili na sila kinahanglan pa moanhi sa siyudad aron mosimba.

“As much as possible because really no matter how efficient our crowd control with the number of crowds, with the number of devotees I don’t think we can be successful nianang dapita so we are asking for other LGUs support nga sa ilahang kaugalingong lugar if they can have virtual solemn gihapon sa sulod sa simbahan or sa vicinity gawas sa simbahan they can come up also virtual novena,” sigon ni Garganera.

Subay niini, si Lt. Col. Wilbert Parilla, Deputy City Director for Operation sa Cebu City Police Office miingon sa ilang meeting nasabutan nila nga magsugod na og butang og physical barriers aron mapugnganang gidaghanon sa mga manimabahay nga motambong sa novena mass.

Nagbutang na sab og markers aron ang mga tawo nga mosimba nga dili na makasulod sa basilica adto mopahimutang sa mga markers nga gibutang aron sab masunod ang social distancing. (BANATNEWS)