Online renewal sa business permit gitanyag sa Mandaue

CEBU, Philippines — Gipahibalo sa kagamhanan sa Dakbayan sa Mandaue ang mga nagdumala og patigayon alang sa labing sayon nga pag-file sa ilang renewal application sa ilang business permit niining tuiga 2021.                

Kini pinaagi sa facebook post sa Public Information Office (PIO) sa kagamhanan sa maong dakbayan.

Ang maong pamaagi ilang gihimo aron paghatag og giya sa mga aplikante sa business permit nga dali nga makaproseso pinaagi sa paggamit sa online e-BPLS System nga gihan-ay na daan sa kagamhanan.                                   

Lakip sa ilang gipahibawo sa facebook post mao ang mga dapit diin mahimutang ang ilang satelite desk, apil na ang nahimutang sa mga mall sa siyudad.

Kini naglakip sa Parkmall sa reclamation area, Insular Square sa North Road sa Barangay Tabok, Pacific Mall sa Barangay Ibabao Estancia, MIPAC Office ug Business One-Stop-Shop  sa BPLO Main Office sa City Hall, grounds ug Mandaue City Sports and Cultural Complex sa Sitio Tribunal sa Barangay Centro sa maong dakbayan.

Nanawagan ang kagamhanan sa dakbayan nga pahimuslan ang paggamit sa online renewal sa business permit ingon man ang one-stop-shop aron dili na mahasol o malangan sa ilang mga transaksyon ilabi na nga nagpadayon pa ang hulga sa COVID-19. – MEL (BANATNEWS)