Pagpatay sa ex-mayoralty bet gitutokan

CEBU, Philippines — Ang Cebu City Police Office (CCPO) naghimo og backtracking sa  mga kalihokan nga gikalambigitan sa pilderong kandidato pagka-mayor didto sa San Fernando nga gibanhigan patay diha sa Lahug niadtong Enero 2.

Si Ruben Feliciano, naglakaw kauban sa pag-umangkon gikan sa parking sa dihang giduol og lima ka mga lalaki ug gipaulanan og bala.

Si Police Lieutenant Colonel Wilbert Parilla, direktor sa operasyon sa CCPO miangkon nga wala pa sila masayod kun asa sila magsugod.

“So far, wala pa gyu’y update. Karon nag-back tracking pa atong stations kon asa ta makasugod nasad,” sigon ni Parilla. Dugang niya nga dili pa masulti kon maghimo ba sila og usa ka Special Investigation Task Group SITG) aron magtutok sa pagpatay kang Feliciano.

“Wala pasad ta’y kuan kun mag-SITG ta considering nga wala man sad siya masulod sa atoang parameters sa SITG,” suma niya.

Gimadoan usab sila sa Police Regional Office (PRO)-7 nga palawman ang imbestigasyon. Si Police Captain Renz Talosig, hepe sa Mabolo Police Station nagkanayon nga magkuha pa sila og mga close-circuit television (CCTV) footage nga naglibot sa lugar nga nahitaboan sa krimen.

Si Feliciano nakontrobersyal nga kandidato pagka-mayor sa lungsod sa San Fernando ug negosyante gipusil-patay sa wala pa mailhing mga mamumuno gawas sa iyang giabangang apartment sa Barangay Apas sa siyudad sa Sugbo kandiadtong Biyernes.

Siya ug ang iyang pag-umangkon nga si Kim Feliciano ang labing unang biktima sa pagpamusil sa Dakbayan karong tuig.

Namatay diha-diha dayon si Feliciano samtang si Kim dali nga gidala sa balay tambalanan ug karon anaa na sa maayong kahimtang. Matud ni Talosig nakaangkon og duha ka samad pinusilan si Feliciano sa tuo nga bahin sa iyang lawas ug sa bukton.

Si Talosig miingon nga gitutukan nila ang negosyo nga angulo isip numero uno nga motibo tungod kay ang biktima negosyante. Dili sab nila isalikway ang kalambigitan sa politika.

Kahinumduman nga nakontrobersyal si Feliciano pakig-atbang kang Mayor Lakambini “Neneth” Reluya kaniadtong 2019 midterm nga piniliay.

Gitudlo siya nga person of interest (POI) sa pagbanhig sa mayor nga hinungdan sa pagkamatay sa iyang bana ug Panadtaran, San Fernando Barangay Captain Ricardo “Nonoy” Reluya kauban ang duha pa nilang kauban nga sakay sa sakyanan.

Gawas sa maong pasangil, upat niya ka supporters nga giingong mga armado ang  gidakop tungod sa pagpamusil duol sa balay sa usa ka kandidato sa konseho sa munisipyo sa Barangay Bugho.— IBM (BANATNEWS)