Unang gitumbok nga killer sa ex-tanod gi-clear sa kapolisan

CEBU, Philippines — Wala pa mailhi sa kapulisan ang suspetsado sa likod sa pagpatay sa usa ka kanhi tanod sa Barangay Inayawan human ang usa sa mga unang gidudahang suspek mipatim-aw sa polis aron limpyohan iyang ngalan .

Matud ni Police Major Angelo Acupinpin, hepe sa Pardo Police Station, aduna na silay nakuha nga usa ka CCTV footage nga nakapalimpyo sa ngalan sa una nga gitudlo nga suspetsado sa pagpatay sa kanhi tanod nga giilang si Jimmy Tabura.

Pipila ka oras human sa hitabo ang 29-anyos nga anak nga lalaki ni Tabura kinsa bugtong saksi sa krimen  nitudlo og usa ka indibidwal nga maoy nagpaluyo sa pagpatay sa iyang amahan.

Ang maong indibidwal miadto ngadto sa Pardo Police Station pagkahuman sa krimen nga nahitabo aron malimpyohan ang iyang ngalan ug nag-ingon nga  nagdula siya og billiard niadtong orasa sa krimen. “Katong niadto sa station nga tawo nga gipasanginlan sa anak sa victim, naka produce siya og CCTV footage nga nagpamatuod nga naa ra gyud siya sa bilyaran during sa pagpamusil,” sigun ni Acupinpin.

Gawas niini, giingon ni Acupinpin nga nakuha usab nila ang usa pa nga CCTV footage,  pipila ka metro ang gilay-on sa lugar nga nahitaboan sa krimen, nga nagpakita sa aktwal nga ‘exit’ sa gunman.

“Nakita nato ang gunman nisakay og motor,medyo wala ni fit sa description sa katong niadto sa station, mao ‘to nga na convince mi nga dili siya mao man gunman,” ingon ni Acupinpin.

Kaniadtong Sabado, gi clear  na sa mga awtoridad ang ngalan sa unang gitumbok nga suspek hinungdan nga balik sa wala ang kapolisan pagila sa mamumuno.

“As of now wala ra namo siya  dayona og dakop kay valid man iyang alibi kay tungod sa CCTV footage ug at the same time, daghan sad niadto sa station nga ni disclose nga gakuyog sila atong tawhana sa bilyaran,” matud ni Acupinpin.

Pagkutlo sa inisyal nga imbestigasyon, giingon ni Acupinpin nga ang anak nga lalaki sa biktima nagtuo nga kadtong gi-clear sa mga polis ang nagpatay sa amahan tungod kay nagkalalis na ang duha kaniadto.

“Ang kanang biktima, katong namatay, is medyo naa nay incident nga gipanganlan na sa iyang papa, kanang victim man gud is gwardya sa (pawnshop), so naa tuy kausa kuno nga wala sila nagkasinabtanay,nasita atong biktima,”sigun ni Acupinpin.

“Mao na nga tungod kay basin naa silay history basin mao nay possibility nga wala siyay laing nahunahunaan kung dili kato ra gyud na tawo kay wala man silay laing na kontrahan,” dugang niya.

Padayon pa ang kapolisan pagkolekta og mga kuha sa CCTV nga makatabang pagpadali pagila sa mga mamumuno ug motibo nganong gipatay ang biktima.

Si Tabura, 50, usa ka security guard sa usa ka pawnshop ug  kaniadto nagtrabaho isip tanod, gipusil sa nawong pasado ala 1 sa hapon niadtong Enero 2.— IBM (BANATNEWS)