DOH wa pay listahan kung unsang bakuna ang gamiton
CEBU, Philippines — Wa pay listahan ang Department of Health Central Visayas gikan sa ilang ulohang buhatan kun unsa nga brand sa Covid-19 vaccine ang gamiton niini.
Si Dr. Mary Jean Loreche, ang tigpamaba sa DOH-7 nga nahinabi sa Banat News miingon nga wala pa silay nadawat nga listahan apan adunay mga nahisgutan sama sa AstraZeneca, Pfizer, ug Sinovac.
Sumala pa ni Loreche, kung aduna na silay final nga listahan, ilaha kini nga ipagawas aron masayran sa publiko.
Giawhag usab ni Loreche ang katawhan nga pabilin responsible sa pag-atiman sa ilang kaugalingon ug mga mnahal sa kinabuhi “Learning to live with COVID-19 is the new normal and we can rise as a community and as a nation together,”niya pa.
Una ng gipahibalo sa Food and Drugs Administration nga wala pay bakuna batok sa Covid-19 nga giaprubahan ang ilang ahensiya. Kung dunay mga bakuna nga walay pagtugot gikan sa ilang ahensiya makonsiderar kini nga ilegal hasta ang paggamit niini.
Sa laing bahin, dinhi sa Cebu City nibalik na sab sa 108 ang active cases sa siyudad base sa gipagawas nga resulta sa Department of Health Central Visayas niadtong adlaw'ng Miyerkules.
Ang siyudad aduna nay total cases nga 10,820 human nakatala og 12 ka bag-ong kaso sa virus nianang adlawa. Apan miabot na sab sa 10,022 ang nangaayo ug naa sa 690 ang deaths.
Ang Mandaue City dunay 15 active cases sa COVID-19 sa 2,690 nga total cases niini tungod sa nadugang nga usa k aka bag-ong kaso. Apan 2,504 niini ang naayo na human nadugangan og duha samtang pabiling 171 ang nakalas.
Samtang ang Lapu-Lapu City dunay 36 ka active cases sa COVID-19 gikan sa natala nga
2,658 kaso niini tungod sa nadugang nga unom. Naa sab sa 2,511 ang recoveries sa dakbayan ug nagpabilin sa 111 ang deaths.
Sa datos sa DOH-7 ang Central Visayas dunay 24,934 total cases sa COVID-19; 622 ang active cases; 22,887 ang recoveries ug 1,425 ang deaths.— Decemay P. Padilla/IBM (BANATNEWS)
- Latest
