Tradisyon sa palihi gisunod hangtud karon

CEBU, Philippines — Bisan niining modernong panahon ang mga tawo padayon pa gihapon  nga nagsagop sa mga pagtuo sa katigulangan ilabina sa matag higayon sa pagsugat sa tungang gabii sa bag-ong tuig.

Kini ang hinungdan nga bisan sa kalisod sa pagkabutang tungod sa nasinati nga hulga sa COVID-19 sa gihapon ang naandan nga nagkadaiyang pagpalihi padayon kining gihimo hangtud karong panahona.

Nagkadaiyang paagi ang pagpahigayon og palihi sa matag pamilyang Pilipino nga gisunod sukad pa kaniadto sa mga katigulangan.

Kini sama sa paghalad og nagkadaiyang lingin nga mga prutas nga ipahiluna diha sa lamesa sa pagtuo nga magdala kini og swerte sa panginabnuhi.

Ang pipila magsul-ob og sinena nga gibordahan og lingin nga adunay nagkadaiyang kolor sa pagsugat sa tungang gabii sa bag-ong tuig paagi gihapon sa pagpaswerte.

Adunay uban ang mangabli sa bintana ug pultahan sa ilang panimalay sa tuyo nga mosulod ang swerte ug ang pipila magmugna og kasaba sa palibot sama sa pagpabuto, pagdokdok og lata o pagpatingog og kusog sa sound system nga maoy paagi sa  pag-abog sa daotang espirito.

Hinuon ang mga relihiyosong Katoliko nagkanayon nga ang maong pagpalihi nga pagahimion labing mahinungdanon nga ubanan kini og pag-ampo ngadto sa Ginoo. —BDB (BANATNEWS)