Diskwento sa pagbayad og buhis sa Talisay gitinguha nga lugwayan
CEBU, Philippines — Tinguha ni Talisay City Treasurer Emma Macuto nga malugwayan pa ang 20 porsyento nga diskwento sa pagbayad sa buhis alang sa real property.
Kini human ang deadline sa maong diskwento natapos niadtong Disyembre 29 ning tuiga.
Nakita ni Macuto nga pwerteng daghana pa sa mga tawo nga lisod nila maatiman hinungdan nga nakahuna-huna sila nga lugwayan kini.
Gani sila sa ilang buhatan nihimo naman sa pag overtime apan dili pa gyud kini ka sarang sa gidaghanon sa mga mobayad og buhis.
Matud pa ni Macuto nga ilang gipaspasan og kwenta ang mga bayronon sa mga mobayad ug tawagan nalang sab dayon aron dili na kini magdasok sa ilang buhatan.
Si Macuto nihangyo ngadto ni Mayor Gerald Anthony “Samsam” Gullas Jr. nga kung mahimo lugwayan pa ngadto sa Enero 31 ang paghatag og diskwento.
Apan nagkinahanglan sab kini og pagtugot sa konseho pinaagi sa resolusyon. —MEL (BANATNEWS)
- Latest