124th nga kasumaran sa kamatayon ni Dr. Jose Rizal gihandum

CEBU, Philippines — Gisaulog kagahapon sa duha ka siyudad ang ika-124th nga kasumaran sa kamatayon ni Dr. Jose Rizal.

Sa Dakbayan sa Sugbo mitambong sa gihimong wreath laying ceremony sa monumento ni Rizal diha sa Plaza Sugbo mao si Bise Myaor Michael Rama og mga konsehal sa siyudad.

Si Rama sa iyang pamahayag nag-awhag sa kabatan-onan nga himoong ehemplo si Dr. Jose Rizal nga mahimo usab nga bayani pinaagi sa kaugalingon nga mga buhat taliwa niining giatubang nga pandemya.

Samtang sa Dakbayan sa Lapu-Lapu gihimo usab ang kalihukan nga gipanguluhan ni Mayor Junard Chan ug Bise Mayor Celedonio Sitoy.

Lakip sa nitambong ang kadagkuan sa nagkadaiyang buhatan sa kagamhanan, mga kawani ug kapolisan.

Sa iyang mensahe si Mayor Chan mipadayag nga ang mga bayanihong buhat ni Dr. Jose Rizal nga gitumong alang sa kaayohan sa katawhang Pilipinhon maoy nahimong hinungdan sa iyang kamatayon.

Ang kamatayon ni Rizal mao usab ang nakapabuka sa mga mata sa katawhan nga nakigbatok sa mga katsila nga gipaagi ang iyang pagpakigbatok pinaagi sa iyang pagsuwat og mga libro.

Si Mayor Chan miingon nga dako niyang garbo nga susama kang Rizal, nga natahasan nga mangulo sa pakiggubat sa gisagubang karon nga pandemya.— MEL (BANATNEWS)