Bag-ong suga ug CCTV camera gipangtaud sa Consolacion
Cebu, Philippines — Hingpit na nga nakabaton og mga CCTV camera ug dugang suga ang kadalanan sa Lungsod sa Consolacion nga gigahinan og mokabat sa P7.7 milyones.
Kini maoy labing ulahing gipatuman nga proyekto ni Mayor Joannes Alegado ug sa iyang inahan nga si Bise Mayor Teresa Alegado sa tuig 2020.
Suma pa ni Bise Mayor Alegado nga ilang gihimo ang pagpahimutang og mga street light ug CCTV camera sa kadalanan sa dakbayan isip pagtabang sa kapolisan sa dinaliang kasulbaran sa mga krimen nga mahitabo sa kadalanan.
Sa maong gahin gikuha ang pundo nga 3. 8 milyones pesos alang sa 65 ka mga CCTV camera nga gipahimutang sa kadalanan samtang mokabat usab sa 3.9 milyones ang 30 ka mga street light nga gipahimutang alang sa labing klaro nga kuha sa footage sa mga CCTV camera niini.
Gidugang sa Bise Mayor nga kini ilang gihimo aron ipadangat usab sa katawhan sa ilang lungsod ang tinud-anay nga pagserbisyo bugti usab sa ilang gibayad nga buhis. (BANAT NEWS)
- Latest