Probinsiya mopatuman og “no left turn” sa dalan Natalio Bacalso

Cebu, Philippines — Ang Probinsiya sa Sugbo uban sa local government units diha sa habagatang bahin sa probinsiya nagplano sa pagpatuman og “no left turn” o “right turn only” policy diha sa dalan Natalio Bacalso gikan sa Siyudad sa Naga hangtud sa Siyudad sa Talisay.

Tinguha niini nga maloagan ang dagan sa trapiko diha sa national highway susama sa gihimo sa Mandaue-Consolacion-Lilioan stretch.

Kaghapon nipahigayon sa ilang ikaduhang tigom si Gobernador Gwendolyn Garcia, mga mayor sa Naga, Lungsod sa Minglanilla ug Talisay uban ang ubang concerned agencies alang sa paghan-ay sa maong plano.

Wala pa ibutyag ang gikatakdang adlaw sa pagpatuman sa maong scheme  tungod kay nagkinahanglan pa kini og igong pagtuon.

Gikatakda usab si Garcia nga makigtagbo ngadto sa Cebu Port Authority, truckers association, Land Transportation Franchising and Regulatory Board, Land Transportation Office diin uban usab unya ang mga mayor aron mapangitaan og paagi ang pagdagan sa mga trailer trucks nga kasagaran maoy mo ukopar og dako sa dalan. (BANAT NEWS)