Opisyales sa Sugbo mangulo sa kalihokan sa Rizal Month
Cebu, Philippines — Ipahigayon karong adlawa sa alas 8:00 sa buntag ang wreath-laying ceremony sa Rizal Monument nga nahimutang diha sa Rizal Street sa Plaza Sugbo.
Ang maong selebrasyon subay kini sa Proclamation No. 126 -2001 nga nagdeklara sa buwan sa Disyembre isip Rizal Month.
Mangulo sa kalihokan ang mga dagkong opisyal sa Dakbayan as Sugbo pinaagi sa pisikal ug virtual. Mopadangat sa tagsa-tagsa nila ka mensahe sila si Mayor Edgar Labella ug Bise Mayor Michael Rama.
Matud sa officer-in-charge sa Cultural and Historical Affairs Commission (CHAC) Bryner Diaz nga angayan gyud panaminan ang mga binuhatan ni Jose Rizal ug ma-apply gyud kini karong panahona partikular na ang pagtinabangay.
“Angay gyud nato sundon ang binuhatan ni Rizal , kon diin sensiro gyud ang iyang pag-alagad sa iyang nasud. Sama sa pandemic nga atong giatubang karon , importante kaayo ang pagtinabangay”, ni Diaz pa.
Nakalatid usab sa Memorandum Circular No. 2020-173 sa Department of Interior and Local Government nga nag-awhag sa opisyales nga mohatag og partisipasyon sa mga kalihokan nga gipahinungod kang Rizal.
Yano lang ang himuong kalihokan diin diyotay lang ang patambongon niini aron mamentinar ang physical distancing ingon man usab magtakdo ang gimando nga health standards o guidelines sa Inter-Agency Task Force on Emerging Infectious Diseases (IATF-EID). Karong tuiga ang tema mao ang “Jose Rizal: Inspirasyon sa Pagbangon at Paghilom ng Bayan”. (BANAT NEWS)
- Latest
