Mga nasunogan sa Looc nakadawat og hinabang pinansiyal

CEBU, Philippines — Gipangulohan ni Mayor Jonas Cortes kagahapon sa buntag  ang pagpanghatag  sa pinansiyal nga hinabang gikan sa kagamhanan sa siyudad ngadto sa mga pamilya nga biktima sa sunog niadtong Disyembre 6, 2020 diha sa Superior,  Barangay Looc, Dakbayan  sa Mandaue.           

Ang maong kalihukan gipahigayon diha sa gym sa nahisgutang barangay.

Ang mga pamilya kinsa tag-iya sa mga panimalay nga hingpit nga naugdaw ang nakadawat kini og tag P10,000 nga hinabang.                            

Si  Atty. Eddu John  Ibañez, executive secretary  ni Cortes nagkanayon nga ang P10,000 nga hinabang alang kini sa pagpamalit og materyales sa mga biktima aron makabalik sila og tukod sa ilang panimalay.                      

Samtang kadtong mga nag-abang kinsa nabiktima usab sa nahisgutang sunog ang gihatagan usab og tag P5,000 aron magamit usab nila sa down payment sa abangan nilang panimalay nga ilang balhinan sa pagpuyo.                

Nasayran  nga ang maong mga biktima sa sunog ang una na nga nakadawat og hinabang gikan sa City Social Welfare and Development Office (CSWDO) nga naglakip sa mga pagkaon ug mga kagamitan sa pagluto ug uban pa.                           

Gibisita na usab sila ni 6th district Congresswoman Emmarie “Lollypop” Ouano-Dizon ug nihatag usab kini ngadto kanila og hinabang sama sa bugbas ug mga delata nga sardinas ug uban pa. –BDB (BANATNEWS)