Notoryus ‘pusher’ napatay
CEBU, Philippines — Gipasanginlang notoryus nga tigpayuhot og illegal nga drugas ang napatay sa kapolisan human sa gipahigayon nga buybust operation diha sa Sitio San Isidro, Barangay Mabolo sa Dakbayan sa Sugbo.
Ang namatay giila nga si Ramon Saraum,32, samtang nadakpan sab ang iyang kapuyo nga si Mary Grace Nalzaro 30, ug mga kaubang sila si Jeffrey Saraum ,25, nga pagumangkon ni Ramon ug silingang si Chris Ygot, 24.
Ang operasyon gilusad sa Station Drug Enforcement Unit ( SDEU) sa Mambaling Pollice Station pinangulohan ni Police Major Dindo Alaras kagahapon sa kaadlawon.
Si Alaras kanhi hepe sa Mabolo Police Station sa wala pa kini madestino sa Mambaling.
Matud pa ni Alaras nga ang suspetsado dugay na nilang gipanid-an sukad nga siya pay hepe sa Mabolo Police Station.
Gawas sa illegal nga drugas gidudahan sab ang napatay nga maoy responsable sa mga pagpanulis ug pagpamusil diha sa maong lugar.
“Kini man gud siya known naman gud siya nga badlongon ug naa jud armas. In fact ang mga patay diri nga previous cases tanan nga situation nagtudlo jud niya. However, wala lang mo barog nga witnesses mao dili ta maka file og kaso kay kahadlokan jud ni siya,” sigon ni Alaras.
Nakuha sa mga imbestigador sa Scene of the Crime Operatives sa patay’ng lawas ni Saraum ang mga pinaketeng gidudahang shabu ug ang usa ka 38 nga revolber.
Ang mga dinakpan ana karon gibalhog sa Mambaling Police Station ug gikatakdang pasakaan og kaso karong adlawa.— IBM (BANATNEWS)
- Latest
