Krimen sa Cebu City mikunhod karong tuiga

CEBU, Philippines — Dako ang natalang pagkunhod sa mga krimen sa Siyudad sa Cebu karong tuiga  kun itandi sa miaging tuig crime statistics basi sa pag-monitor sa Cebu City Police Office (CCPO).

Sa illegal drug operations, ang CCPO nagpahigayon og 1,386 ka operasyon karong tuiga mas daghan kini sa 601 nga operasyon sa miaging tuig.

Apan bisan mas daghang operasyong gihimo karong tuiga mokabat lang sa P23,095,730 nga balor sa illegal nga drugas ang nasakmit itandi sa P97,552,324 sa miaging tuig.

“Nakabantay ta there were a lot of incidents, dagko nga dakop such as katong sa Guadalupe, tapus naay 22 kilos sa Lapu-Lapu tapos naa pay two months ago nadakpan sa Luzon and accordingly that was bound for Cebu, so dako to nga factor pud siguro kay gani man kay ang ilang produkto nga dal-on diri na intercept sa laing lugar,” matod pa ni Police Lt. Colonel Clark Arriola, Information Officer sa CCPO nagkanayon.

Samtang sa ilegal nga sugal nakahimo sila og 997 operasyon  ning tuiga ug 1,063 ang nadakpan, mas gamay sab kini kun itandi sa miaging tuig nga 1,357 ka operasyon  ug 12,808 ka tawo ang nasikop sa miaging tuig.

Ang kinatibuk-ang mga crime incidents nga natala alang sa miaging tuig anaa sa  12,568, mas taas nga kung itandi sa mga insidente sa niining tuig nga 7,762.

Ang pagpatuman sa kahusay ug kalinaw mikunhod usab 9,340 gikan sa miaging tuig kung itandi sa kini nga tuig nga adunay 5,982.

Sa walo ka mga nag-unang gitutokang krimen, ang tuig 2020 nakatala tanan og 1,084 ka mga hitabo. Apan mas mubo kini sa 2,412 sa miaging tuig.

Ang kaso sa pagpangawat maoy nag-una nga most committed crime karong tuiga nga adunay 503 nga mga insidente  itandi sa 1,347 sa miaging tuig.

Gamay ra sab ang na report nga carnapping sama sa miaging tuig nga tag duha lang ka kaso.

Ang average monthly index crime alang sa miaging tuig naa sa 20.7, nga mikunhod hapit sa katunga alang sa niining tuig nga 9.3.

Ang crime cleared efficiency sa CCPO misaka ngadto sa 96.4 gikan sa 91.2 porsiyento sa miaging tuig.

Samtang ang crime solution efficiency sa kapolisan misaka ngadto sa 90 percent gikan sa 84.1 percent sa miaging tuig.

“Atong quarantine status so gamay ang naa sa dalan, and daghan sad tang police visibility, naa tay augmentation from RMFB, from CRBN, then gani man katong baa tay quarantine passes so na minimize ang mga tawo nga naglakaw-lakaw so less people means less opportunities for criminals,” pamahayag ni Arriola mahitungod sa hinungdan nga nakaingon sa pagkunhod sa mga krimen. —IBM (BANATNEWS)